గత రెండు రోజులుగా మహేష్‌బాబు (Mahesh Babu) ఫ్యాన్స్‌ NT NINE అనే పేరును తమ డీపీలుగా, స్టేటస్‌లుగా తెగ పెట్టేస్తున్నారు. దానికి కారణం ఓ ఫొటో. ఓ మీమర్స్‌ పేజీ, సినిమా లీక్‌/ పుకార్ల పేజీ చేసిన పనే దీనంతటికి కారణం. మీరు కూడా ఆ ఫొటో చూసి ఉంటారు. రాజమౌళి (S. S. Rajamouli) – మహేష్‌బాబు సినిమా టీమ్‌ త్వరలో యూరప్‌ వెళ్లబోతోంది అని చెబుతూ ఓ ఫొటోను షేర్‌ చేసింది NT NINE అనే ఇన్‌స్టాగ్రామ్‌ పేజీ. ఈ సినిమా అప్‌డేట్స్‌ కోసం చాలా రోజులుగా వెయిట్‌ చేస్తున్న ఫ్యాన్స్‌.
దొరికిందే మహా ప్రసాదం అనుకుని తెగ షేర్‌ చేశారు. పైన మీరు చూసిన ఫొటో అదే. అందులో వాళ్ల చొక్కాల మీద NT NINE అని ఓ ఎంబ్లమ్‌లా ఉంది. రాజమౌళి తన సినిమాలకు ఇలా చొక్కాల మీద పేరు రాసుకుంటూ ఉంటారు. దీంతో ఇదే పేరేమో అనుకున్నారు. తెగ షేర్‌ చేసేశారు. కట్‌ చేస్తే అది పేరు కాదని తేలింది. ఇక్కడో మరో విషయం కూడా బయటకు వచ్చింది. ఆ ఫొటో కూడా ఈ సినిమాకు సంబంధించింది కాదు.
రాజమౌళి, ప్రియాంక చోప్రా (Priyanka Chopra) , కీరవాణి (M. M. Keeravani) ఉన్న ఆ ఫొటో మూడేళ్ల కిందటిది. ‘RRR’ సినిమా స్పెషల్ స్క్రీనింగ్ అమెరికాలో జరిగినప్పుడు.. ప్రియాంక చోప్రా వచ్చింది. ఆ కార్యక్రమాన్ని కూడా ఆమె హోస్ట్‌ చేసింది. అప్పుడు దిగిన ఫొటోనే ఇది. ఆ రోజు ఆమె ఇన్‌స్టాగ్రామ్‌లో షేర్‌ చేసింది కూడా. ఆ ఫొటోను ఇప్పుడు బయటకు తీసిన వైరల్ చేసి సినిమా గురించి తెగ మాట్లాడుకునేలా, పనిలో పనిగా వాళ్ల ఇన్‌స్టాగ్రామ్‌ పేజీని కూడా ప్రమోట్‌ చేసుకున్నారు.
ఇక ఈ సినిమా విషయానికొస్తే సినిమా రిహార్సిల్స్‌ ప్రస్తుతం సిటీలోని అల్యూమినియం ఫ్యాక్టరీలో జరుగుతున్నాయి. త్వరలో కెన్యా లేదా ఒడిశాలో సినిమా రెగ్యులర్‌ షూటింగ్‌ ఉంటుంది అని చెబుతున్నారు. త్వరలోనే ఈ విషయంలో టీమ్‌ అప్‌డేట్‌ ఇస్తుందని సమాచారం.
