పాటల్లో అన్నా చెల్లెళ్ల అనురాగం

తండ్రిలా కంటికి రెప్పలా కాపాడే అన్నయ్య, తల్లిలా ప్రేమ కురిపించే చెల్లెలు. కాసేపు పోట్లాడుకొని.. క్షణంలో కలిసిపోయే వీరి మధ్య అనుబంధాన్ని కొన్ని మాటల్లో చెప్పడమంటే కష్టమే. కానీ సినీ కవులు పాటల రూపంలో అన్నాచెల్లెళ్ల అనురాగాన్ని నింపారు. వాటికి మధురమైన బాణీలు కట్టి సంగీత జ్ఞానులు మనకి అందించారు. అప్పటికీ, ఇప్పటికీ, ఎప్పటికీ ఆ పాటలు శాశ్వతంగా నిలిచిపోతాయి. నేడు (ఆగస్టు 18) రాఖీ పండుగ సందర్బంగా ఆ అపురూప గీతాల గురించి పరిచయం చేస్తున్నాం.

చిట్టి చెల్లెలు

మహానటుడు నందమూరి తారక రామారావు నటిస్తున్నప్పటికీ “చిట్టి చెల్లెలు” టైటిల్ పెట్టి కథకు పూర్తి న్యాయం చేశారు. ఇందులో ఎన్టీఆర్ చెల్లెలి కోసం తాపత్రయం పడే అన్నగా పాత్రకు ప్రాణం పోశారు. ఈ సినిమా ప్రారంభంలో వచ్చే “అందాల పసిపాప.. అన్నయ్యకు కనుపాప .. బజ్జోవే బుజ్జాయి” పాట ఎప్పటికీ చెరగని ముద్ర వేసుకుంది.

రక్త సంబంధం

https://www.youtube.com/watch?v=XBujIffX5zE

రామారావు, సావిత్రి అన్న చెల్లెలుగా నటించిన “రక్త సంబంధం” ఓ ఆణిముత్యం. ఈ సినిమాలో ఇద్దరు పోటీ పడి నటించారు. ఇందులోని “చందురుని మించు అందములొలికించు” పాట అద్భుతం. ఈ పాటలో “కంటిలో పాప, ఇంటికే జ్యోతి, చెల్లి నా ప్రాణమే” అంటూ మహానటుడు పాడుతుంటే మహిళల కంట కన్నీరు ఆగలేదు.

బంగారు గాజులు

అక్కినేని నాగేశ్వర రావు, విజయ నిర్మల అన్న చెల్లెళ్లుగా నటించిన సినిమా “బంగారు గాజులు”. ఈ చిత్రం కోసం ప్రముఖ రచయిత సి.నారాయణ రెడ్డి రాసిన “అన్నయ్య సన్నిధి.. అదే నాకు పెన్నిధి, కనిపించని దైవమే.. ఆ కనులులోనా ఉన్నదీ” పాట అందరి నోటా మెప్పుఅందుకుంది. పి.సుశీల గాత్రంలో ఈ పాట అజరామరంగా నిలిచింది.

ఆడపడుచు

ఆడపడుచు చిత్రంలో చంద్ర లేఖకు అన్నయ్యలుగా మహా నటుడు ఎన్టీఆర్, సోగ్గాడు శోభన్ బాబు నటించారు. పుట్టినరోజున అన్నల దీవెన వెన్నెల కన్నా చల్లదనం అంటూ సాగే “అన్నా నీ అనురాగం.. ఎన్నో జన్మల పుణ్య ఫలం “.. పాటను సుశీల ఎంతో చక్కగా పాడారు. అప్పట్లో ఈ సినిమా 5 కేంద్రాల్లో వంద రోజులకంటే ఎక్కువగా ఆడింది.

ముద్దుల మామయ్య

https://www.youtube.com/watch?v=TctaKb0sqGw

కోడి రామకృష్ణ దర్శకత్వంలో వచ్చిన ముద్దుల మామయ్య సినిమా సిస్టర్ సెంటిమెంట్ తో ఆకట్టుకుంది. ఈ సినిమాలో బాలకృష్ణకు సీత చెల్లెలుగా నటించింది. ఇందులో “మామయ్య అన్న పిలుపు” పాట హుషారుగా సాగి బాలకృష్ణ అభిమానులనే కాకుండా తెలుగు మహిళలందరినీ అలరించింది. “అరచేత పెంచాను చెల్లిని.. ఈ అరుదైన బంగారు తల్లిని.. ” అంటూ బాలయ్య పాడి ఆడపడుచులకు అన్నయ్యాడు.

హిట్లర్

వరుస అపజయాలు ఎదురవుతుంటే మెగాస్టార్ చిరంజీవి సిస్టర్ సెంటిమెంట్ ని నమ్ముకున్నాడు. ఐదు మంది చెల్లెళ్లకు అన్నగా హిట్లర్ చిత్రంలో నటించి విజయం సొంతం చేసుకున్నాడు. ముత్యాలు సుబ్బయ్య దర్శకత్వం వహించిన ఈ చిత్రంలో ” కన్నీళ్ళకే కన్నీళ్లొచ్చే” పాటతో కన్నీళ్లు తెప్పించాడు. “అమ్మలోని లాలన, నాన్నలోని పాలన, అందిపుచ్చుకున్న అన్న నీడలో” అంటూ అన్న చెల్లెలు పాడే తీరు అన్నలకు బాగా నచ్చింది.

పుట్టింటికి రా చెల్లి

అన్న చెల్లెలుగా అర్జున్, స్వాతి నటించిన “పుట్టింటికి రా చెల్లి” సినిమాను మహిళా లోకం మెచ్చింది. మొదలు నుంచి చివరి వరకు సెంటిమెంట్ సీన్లతో నిండిన ఈ చిత్రానికి పాటలు ప్రాణం పోశాయి. ప్రధానంగా “చామంతి, పూబంతి .. చిన్నారి నా సిరిమల్లె “, “పుట్టింటికి రావే చెల్లి అని పిలిచింది మన ఇంటి తల్లి” పాటలు గుర్తిండి పోయాయి.

ఒరేయ్ రిక్షా

దర్శకరత్న దాసరి నారాయణ మూర్తి, విప్లవ సినిమాలు తీసే ఆర్.నారాయణ మూర్తి కలిసి మనకు అందించిన అపురూప చిత్రం ఒరేయ్ రిక్షా. ఇందులో వందేమాతరం శ్రీనివాస్ స్వరపరచి, ఆలపించిన “మల్లె తీగకు పందిరి ఓలే .. మసక చీకటిలో వెన్నెల ఓలే .. నీ పాదం మీద పుట్టు మచ్చనై చెల్లమ్మా..తోడ బుట్టిన ఋణం తీర్చుకుంటనే చెల్లెమ్మా ” పాట ఆ యేడాది మొత్తం మారుమోగింది. ఇప్పటికీ వందేమాతరం శ్రీనివాస్ కనిపిస్తే ఎంతో మంది ఈ పాట పాడమని అడుగుతుంటారు.

అన్నవరం

ప్రేమ కథ చిత్రాల హీరోగా పేరు తెచ్చుకున్న పవర్ స్టార్ పవన్ కళ్యాణ్ చేసిన చెల్లెలి సెంటిమెంట్ చిత్రం అన్నవరం. ఇందులో పవన్ కి చెల్లెలుగా తమిళ హీరోయిన్ సంధ్య నటించింది. వీరి అనుబంధం నేటి తరం వారికి బాగా నచ్చింది. ఇందులోని “అన్నయ్య అన్నావంటే అంటే ఎదురవనా, అలుపై ఉన్నానంటే నిదురవనా.. చెల్లి పోనీ బంధం నేన్నమ్మ చిట్టి చెల్లమ్మ, వెళ్లి పోనీ చుట్టం నేనమ్మా” అనే పాటను రమణ గోగుల కొత్తగా స్వరపరచి పది కాలాల పాటు నిలిచేలా చేశారు.

గోరింటాకు

అప్పట్లో సూపర్ హిట్ గా నిలిచినా గోరింటాకు సినిమా పేరుతో 2008 లో మరో చిత్రం వచ్చింది. ఇందులో రాజశేఖర్, మీరా జాస్మిన్ అన్నా చెల్లెలుగా నటించారు. కమర్షియల్ హిట్ సాధించకపోయినా మంచి చిత్రంగా పేరు సంపాదించుకుంది. ఈ మూవీ కోసం ప్రముఖ సంగీత దర్శకులు ఎస్.ఏ.రాజ్ కుమార్ స్వరపరిచిన
“అన్నా చెల్లిలి అనుబంధం.. జన్మ జన్మల సంబంధం” అనే పాట అందరీ మనసులను కదిలించింది.