ప్రముఖ దర్శకుడు త్రివిక్రమ్ (Trivikram) తనయుడు ఇటీవల తిరుమలకు కాలినడకన వెళ్లి స్వామివారి దర్శనం చేసుకున్న విషయం తెలిసిందే. ఈ క్రమంలో కుటుంబం మొత్తం వేంకటేశ్వర స్వామి దర్శనం చేసుకుని వస్తున్న వీడియోలు, ఫొటోలు కూడా సోషల్‌ మీడియాలో వైరల్‌ అయ్యాయి. ఈ క్రమంలో ఆయన పెద్ద కుమారుడు రిషి ఫొటోలు కూడా వైరల్‌ అయ్యాయి. చూడటానికి అచ్చం హీరోలా ఉన్నాడు అంటూ కొందరు కామెంట్స్‌ చేశారు. కుర్రాడు కూడా అలానే ఉన్నాడులెండి.
అయితే, ఆయన తండ్రిలా దర్శకత్వం వైపు వస్తున్నారు అని టాక్‌. అవును ఇప్పటికే రిషి డైరక్షన్‌ డిపార్ట్‌మెంట్‌లో చేరిపోయారట. అయితే అది తండ్రి త్రివిక్రమ్ దగ్గర కాదు, ఓ యంగ్‌ డైరక్టర్‌ దగ్గరట. విజయ్ దేవరకొండ (Vijay Devarakonda) హీరోగా గౌతమ్ తిన్ననూరి (Gowtam Naidu Tinnanuri) దర్శకత్వంలో ఓ సినిమా తెరకెక్కుతున్న సంగతి తెలిసిందే. ఈ సినిమాకు రిషి పనిచేస్తున్నాడట. గౌతమ్ తిన్ననూరికి రిషి అసిస్టెంట్‌గా వ్యవహరిస్తున్నట్లు తెలిసింది. అయితే ఈ విషయంలో ఎక్కడా అధికారిక సమాచారం లేదు.
అయితే రిషి ఇలానే దర్శకత్వ విభాగంలోనే ఉంటాడా? లేక హీరోగా ఎంట్రీ ఇస్తాడా అనే చర్చ కూడా జరుగుతోంది. ఇప్పుడు ఇండస్ట్రీలో ఉన్న చాలామంది స్టార్‌ హీరోలు తొలినాళ్లలో ఇలా దర్శకత్వ విభాగంతోనే తమ ప్రయాణాన్ని ప్రారంభించారు. సినిమా గురించి చాలా విషయాలు తెలసుకోవాలంటే దర్శకత్వ విభాగమే మంచిది అనే చర్చ ఇండస్ట్రీలో ఎప్పటినుండో ఉంది కూడా. చూడాలి మరి రిషి మనసులో, త్రివిక్రమ్ మైండ్‌లో ఏముందో?
అన్నట్లు, గౌతమ్ తిన్ననూరి – విజయ్ ప్రాజెక్ట్‌ అంటే త్రివిక్రమ్ సొంత సినిమానే. కాబట్టి సొంత ప్రాజెక్ట్‌తోనే తనయుడి డైరక్షన్‌ డిపార్ట్‌మెంట్‌ ఎంట్రీ కూడా జరుగుతోంది అన్నమాట. ఇక త్రివిక్రమ్ సినిమాల సంగతి చూస్తే.. అల్లు అర్జున్‌తో నెక్స్ట్ సినిమా ఉంటుంది. ఇప్పటికే అనౌన్స్‌ అయిన ఈ సినిమా పట్టాలెక్కాలంటే ఇంకా చాలా సమయం పడుతుందట. పాన్ ఇండియా లెవల్‌లో రూపొందుతున్న ఈ సినిమా ప్రీ ప్రొడక్షన్‌ పనులు జరుగుతున్నాయట.
