టీఎస్సార్ కు అక్కినేని పురస్కారం

పారిశ్రామికవేత్తగా, రాజకీయనేతగా టి.సుబ్బిరామిరెడ్డి పరిచితులు. వీటన్నిటికీ మించి కళాబంధుగా సుప్రసిద్ధుడాయన. కళ, కళాకారులెక్కడున్నా అక్కడికి కూతవేటు దూరం వుంటారు టీఎస్సార్. ఉన్న నటీనటులతో పోలిస్తే జాతీయ, రాష్ట్ర ప్రభుత్వాలిచ్చే అవార్డులు ఒకటో వంతు కూడా ఉండవు. అందుకే వాటికి ధీటుగా ఈయన అవార్డులు అందిస్తూ కళాకారులకు ప్రోత్సాహాన్ని ఇస్తుంటారు. ఆ వేడుక కూడా అన్ని పరిశ్రమలకు చెందిన ప్రముఖులను ఒకే వేదికపైకి తీసుకొస్తుంది.

అలాంటిది ఆయనకు అవార్డు ఇవ్వడమంటే అవార్డుకే అవార్డు ఇచ్చినట్టు. రసమయి సంస్థ ప్రముఖులకు ఏటా అవార్డులను అందిస్తోన్న విషయం తెలిసిందే. ఇందులో భాగంగా అక్కినేని నాగేశ్వరరావు జీవిత సాఫల్య పురస్కారాన్ని సుబ్బిరామిరెడ్డికి అందజేయనున్నట్టు సంస్థ ప్రకటించింది. ఈ నెల 21న హైదరాబాద్ లో జరుగనున్న ఈ వేడుకలో వెంకయ్య నాయుడు వంటి రాజకీయ ప్రముఖులు సహా పలువురు చిత్ర రంగ ప్రముఖులు హాజరవ్వనున్నారు.