పుష్ప-2 (Pushpa 2: The Rule) విడుదలతో ఐకాన్ స్టార్ అల్లు అర్జున్ (Allu Arjun) కెరీర్ మరో లెవెల్ కు చేరుకుంది. సుకుమార్ (Sukumar) దర్శకత్వంలో వచ్చిన ఈ చిత్రం వరల్డ్వైడ్ భారీ విజయాన్ని సాధించింది. తెలుగు రాష్ట్రాల నుంచి హిందీ బెల్ట్ వరకూ ప్రతీ చోటా ఈ సినిమా కొత్త రికార్డులను సృష్టిస్తోంది. ఓవర్సీస్ లో కూడా అద్భుతమైన స్పందన లభిస్తోంది. నార్త్ అమెరికాలో 10 మిలియన్ డాలర్స్ మార్క్ చేరుకుని అద్భుతమైన వసూళ్లు సాధించింది. అయితే, పుష్ప-2 విజయానంతరం అల్లు అర్జున్ తదుపరి ప్లాన్పై అందరి దృష్టి పడింది.
బన్నీ ప్రస్తుత ఫోకస్, పుష్ప-2 సక్సెస్ ఫుల్ ప్రమోషన్లపైనే ఉందని తెలుస్తోంది. విడుదలకు ముందే భారీ ప్రొమోషన్ ప్లాన్ చేసిన బన్నీ టీం, విడుదల తర్వాత కూడా ఆ హైప్ కొనసాగించడానికి ప్రత్యేక ఈవెంట్లు నిర్వహించనున్నారు. ఇప్పటికే ఢిల్లీ, ముంబై, హైదరాబాద్ వంటి నగరాల్లో ప్రెస్ మీట్లను ప్లాన్ చేశారు. కానీ డిసెంబర్ 4న సంధ్య థియేటర్ వద్ద జరిగిన తొక్కిసలాట ఘటన, ఈ సక్సెస్ సెలబ్రేషన్లలో చిన్న ఆటంకంగా మారింది.
ఆ ఘటనలో ఒక మహిళ ప్రాణాలు కోల్పోగా, పలువురు గాయపడ్డారు. ఈ కారణంగా పోలీసులు అల్లు అర్జున్ను విచారణకు పిలవడం, కోర్టు రిమాండ్ విధించడం వంటి పరిణామాలు చోటు చేసుకున్నాయి. హైకోర్టు మధ్యంతర బెయిల్ ఇచ్చి విడుదల చేసినప్పటికీ, ఈ కేసు ఇంకా పూర్తిగా ముగియలేదు. అయితే బన్నీ, పుష్ప-2 సక్సెస్ ఫుల్ ఈవెంట్స్ పూర్తి చేసి, తరువాత కుటుంబంతో కలిసి వెకేషన్కు వెళ్లే ఆలోచనలో ఉన్నారు.
వీటితో పాటు త్రివిక్రమ్ శ్రీనివాస్ (Trivikram) దర్శకత్వంలో తన తదుపరి సినిమాపై దృష్టి పెట్టనున్నారు. ఇది పాన్-ఇండియా స్థాయిలో తెరకెక్కే మాస్ ఎంటర్టైనర్గా ఉండబోతుందని సమాచారం. ఈ చిత్రాన్ని సితార ఎంటర్టైన్మెంట్స్ భారీ బడ్జెట్తో నిర్మించనుంది. మరోవైపు, అల్లు అర్జున్ కొన్ని రోజులు బ్రేక్ తీసుకుని తన ఫ్యామిలీ తో కూడా సమయం కేటాయించనున్నారు. ఇక ప్రాజెక్టుల విషయంలో బన్నీ తదుపరి అడుగులపై ఫ్యాన్స్ ఎంతో ఆసక్తిగా ఎదురు చూస్తున్నారు.
