తెలుగు ‘100% లవ్‌’ చిత్రాన్ని తమిళంలో రీమేక్‌ చేస్తున్న విషయం తెల్సిందే. మొదట ఈ రీమేక్‌లో హీరోయిన్‌గా లావణ్య త్రిపాఠిని తీసుకున్నారు. షూటింగ్‌కు ఏర్పాట్లు పూర్తి చేసిన తర్వాత కొన్ని కారణాలతో లావణ్య త్రిపాఠి సినిమా నుండి తప్పుకుంది. దాంతో చిత్ర నిర్మాతకు నష్టం వాటిల్లింది. దాదాపు మూడు కోట్ల నష్టంకు లావణ్య త్రిపాఠి కారణం అయ్యిందంటూ ఆ తమిళ నిర్మాత ఆగ్రహం వ్యక్తం చేశాడు. లావణ్య త్రిపాఠిపై కఠిన చర్యలు తీసుకోబోతున్నట్లుగా ఆ నిర్మాత మీడియా ముందుకు వచ్చి మరీ చెప్పుకొచ్చాడు. ఆ తర్వాత కొన్ని రోజులకు నడిగర్‌ సంఘం మరియు నిర్మాత మండలి తీర్మానం ప్రకారం మూడు కోట్ల రూపాయలను నిర్మాతకు లావణ్య చెల్లించినట్లుగా వార్తలు వచ్చాయి.
మీడియాలో లావణ్యకు ఫైన్‌ అంటూ భారీ స్థాయిలో వార్తలు వచ్చాయి. తాజాగా లావణ్య త్రిపాఠి ఒక మీడియా సంస్థతో మాట్లాడుతూ తన గురించి వస్తున్న వార్తలపై ఆగ్రహం వ్యక్తం చేసింది. ఇలాంటి చెత్త ప్రచారం తప్ప మరే వార్తలు దొరకడం లేదా అంటూ ఆగ్రహం వ్యక్తం చేసింది. మీడియా వారు ఆ విషయంలో అతి చేస్తున్నారు అంటూ అసహనం వ్యక్తం చేసింది. తనపై ఇలాంటి ఎన్ని వార్తలు వచ్చినా కూడా కెరీర్‌పై ఎలాంటి ప్రభావం ఉండదని చెప్పుకొచ్చింది. ఇంతకు తాను ఫైన్‌ కట్టిందా లేదా అనే విషయం మాత్రం చెప్పలేదు.
