సినిమా పరిశ్రమకు చేసిన విశేష సేవలకుగాను ఫలానా హీరోకు పద్మశ్రీ పురస్కారం ఇచ్చారు, పద్మభూషణ్ ఇచ్చారు, పద్మ విభూషణ్ ఇచ్చారు అని రాస్తుంటారు. లేదంటే ఫలానా నటుడికి, నటికి అని రాస్తుంటారు. మీరూ చదువుతుంటారు. ఈ క్రమంలో ఎప్పుడైనా ఇలాంటి ప్రతిష్ఠాత్మక పురస్కారాల లిస్ట్లో దర్శకుల పేర్లు ఎందుకు పెద్దగా వినిపించవు అని మీకు అనిపించదా? అయితే మీ లాంటి వాళ్లు చాలా మందే ఉంటారు. కావాలంటే మీరే చూడండి ఏటా పద్మ పురస్కారాలను అనౌన్స్ చేస్తుంటారు.
అందులో స్టార్ హీరోలు, సీనియర్ నటులు, సీనియర్ నాయికల పేర్లు కనిపిస్తుంటాయి. దర్శకుల (Directors) పేర్లు తక్కువగా కనిపిస్తాయి. ఒక్కోసారి అస్సలు కనిపించనే కనిపించవు. అందుకే ప్రతి హీరోకు ఏదో ఓ సందర్భంలో ఏదో ఒక అవార్డు వస్తుంటుంది. దర్శకుల విషయంలో అయితే కె.విశ్వనాథ్, బాపు లాంటి వాళ్లకే ‘పద్మ’ గౌరవం దక్కింది. ఇక ఇప్పుడున్న దర్శకుల్లో అయితే రాజమౌళి (S. S. Rajamouli) మినహా ఇంకెవరికీ రాలేదు. దీంతో అసలు మన దగ్గర పద్మ పురస్కారాలు అందుకోదగ్గ దర్శకులే లేరా అనే ప్రశ్న ఉదయిస్తోంది.
అలాగే ఇప్పుడున్న వాళ్లు సినిమా పరిశ్రమకు చేస్తున్న సేవలు సరిపోవడం లేదా అనే ప్రశ్న కూడా వినిపిస్తోంది. అయితే ఎవరికి ఏ అవార్డు ఇవ్వాలన్నా ఆయా రాష్ట్ర ప్రభుత్వాలు సిఫారసు చేస్తుంటాయి. మరి తెలుగు రాష్ట్రాల నుండి దర్శకుల గురించి ఎవరూ సిఫారసు చేయడం లేదేమో. ఇప్పుడున్న దర్శకుల్లో సీనియర్లు.. సమాజం మీద ఇంపాక్ట్ చూపించగల దర్శకులు చాలామందే ఉన్నారు. ఇక్కడ పేర్లు చెప్పుకుంటే కొంతమంది పేర్లే ఎందుకు? అనే చర్చ వస్తుంది.
కాబట్టి పేర్ల జోలికి పోవడం లేదు. కానీ పరిశ్రమ గర్వించదగ్గ సినిమాలు, జాతిని ఉద్ధరించే సినిమాలు చేసిన వాళ్లైతే మన దగ్గర ఉన్నారు. ఒకవేళ వాళ్ల పనితనం సరిపోదు అనుకుంటే వారి కథల్లో నటించిన హీరోలకు అవార్డులు ఇవ్వడం కూడా సరికాదు. కాబట్టి ఇప్పటికైనా నేటితరం బెస్ట్ దర్శకులకైనా పద్మ గౌరవం దక్కేలా చూస్తే బాగుంటుంది. అన్నట్లు శతాధిక చిత్రాలు తీసి, పరిశ్రమ మీద చెరగని ముద్ర వేసిన రాఘవేంద్రరావు (Raghavendra Rao), దివంగత దాసరి నారాయణరావుకు (Dasari Narayana Rao) కూడా ఈ గౌరవం దక్కలేదు.
