‘రామాయణ’ కోసం యశ్‌ పారితోషికం లెక్క తేలిందా? త్వరలో సెట్స్‌లో..!

ప్రస్తుతం దేశంలో తెరకెక్కుతున్న పాన్‌ ఇండియా సినిమాల్లో ‘రామాయణ’ ఒకటి. అన్ని సినిమాల్లోకెల్లా ఇదే స్పెషల్‌ అని చెప్పొచ్చు. కథ, కాస్టింగ్‌ తదితర అంశాల వల్ల ఈ సినిమాకు ఆ స్థాయి వచ్చింది. ఈ సినిమాలో రావణుడిగా ప్రముఖ కథానాయకుడు యశ్‌ నటిస్తాడు అని గతంలోనే ప్రకటించారు. ఇప్పుడు ఆ సినిమా సెట్స్‌లోకి ఆయన అడుగుపెట్టే సమయం ఆసన్నమైంది అని అంటున్నారు. నితేశ్‌ తివారి (Nitesh Tiwari) దర్శకత్వం వహిస్తున్న ఈ సినిమాలో రాముడిగా రణ్‌బీర్‌ కపూర్‌ (Ranbir Kapoor).. సీతగా సాయిపల్లవి (Sai Pallavi) నటిస్తున్న విషయం తెలిసిందే.

Yash

ఈ సినిమాలో యశ్‌ (Yash) నటించడమే కాకుండా నిర్మాణ భాగస్వామిగా కూడా ఉన్నాడు. సినిమా ప్రకటించి, అతని పాత్ర గురించి ప్రకటించి ఇన్ని రోజులు అయినా ఇంకా ఆయన షూటింగ్‌ మొదలుకాకపోవడంతో ఏమవుతోందో అర్థంకాలేదు. అయితే ఇప్పుడు మార్చి నుండి యశ్‌ రంగంలోకి దిగనున్నారని సమాచారం అందుతోంది. లంక నేపథ్యంలో వచ్చే సన్నివేశాలతో ఈ షెడ్యూల్‌ మొదలవుతుందని అంటున్నారు.

ఈ షెడ్యూల్‌ కోసం చిత్ర బృందం కొన్ని ప్రత్యేకమైన సెట్లను సిద్ధం చేయించింది. అందులోనే యశ్‌ సీన్స్‌ చిత్రీకరిస్తారట. అయితే ఇక్కడో డౌట్‌ ఏంటంటే.. ‘రామాయణ’కు సంబంధించి కీలక పాత్రధారులకు సంబంధించిన చాలా సీన్స్‌ ఇప్పటికే చిత్రీకరించేశారు. మరి ఇప్పుడు యశ్‌ సీన్స్‌ అంటే ఎవరితో కనెక్ట్‌ లేని సీన్సే అయి ఉండాలి. ఒకవేళ అదే నిజమైతే యశ్‌ పాత్ర ‘రామాయణ 2’ సినిమా నుండి కీలకంగా ఉంటుంది అని చెప్పాలి.

మరోవైపు యశ్‌ పారితోషికం విషయంలో చర్చలు ఓ కొలిక్కి వచ్చాయని అంటున్నారు. సుమారు రూ.150 కోట్ల పారితోషికంతో యశ్‌ ‘రావణుడు’ అవుతున్నాడట. ఆ పారితోషికం నిర్మాణ భాగస్వామి రూపంలో వస్తుందట. ఇక సినిమా తొలి భాగం వచ్చే ఏడాది దీపావళికి వస్తుంది. రెండో భాగం 2027 దీపావళికి తీసుకొస్తారట. అన్నట్లు యశ్‌ ప్రస్తుతం గీతూ మెహన్‌ దాస్‌ Geetu Mohandas) సినిమా ‘టాక్సిక్‌’లో(Toxic) నటిస్తున్నాడు. ఈ లెక్కన ‘కేజీయఫ్‌ 3’  (KGF)   ఇంత త్వరగా స్టార్ట్‌ అయ్యే పరిస్థితే లేదు.