తమిళ సినీ ఇండస్ట్రీలో కల్ట్ క్లాసిక్గా నిలిచిన చిత్రం ‘యుగానికి ఒక్కడు’ (తమిళంలో ఆయిరత్తిల్ ఒరువన్) సినిమా రెండో భాగంపై మళ్లీ చర్చ మొదలైంది. 2010లో విడుదలైన ఈ అడ్వెంచర్ డ్రామా ప్రేక్షకులను విభిన్నమైన కథతో ఆకట్టుకుని సిల్వర్ స్క్రీన్ పై ఒక కొత్త లోకాన్ని ఆవిష్కరించి, సినీ లవర్స్ మనస్సులో ప్రత్యేకమైన స్థానం సంపాదించింది. డైరెక్టర్ సెల్వరాఘవన్ దర్శకత్వంలో వచ్చిన ఈ చిత్రంలో కార్తీ, రీమా సేన్, ఆండ్రియా ప్రధాన పాత్రల్లో నటించారు.
ఇప్పటికే ఈ సినిమాకు సీక్వెల్ వచ్చే అవకాశం ఉందని గతంలోనే దర్శకుడు సంకేతాలు ఇచ్చారు. రెండో భాగానికి సంబంధించిన కథా రూపకల్పన దాదాపు పూర్తయ్యిందని, ఇందులో తన తమ్ముడు హీరో ధనుష్ నటించే అవకాశం ఉందని టాక్ వినిపిస్తోంది. అయితే ప్రాజెక్ట్ ఇంకా అధికారికంగా ప్రారంభం కాలేదు.
ఇలాంటి సమయంలో ఈ సినిమా సీక్వెల్ పై ఆండ్రియా చేసిన వ్యాఖ్యలు మరింత ఆసక్తిని పెంచాయి. ఆమె తాజాగా ఓ ఇంటర్వ్యూలో మాట్లాడుతూ, సీక్వెల్ రూపొందితే అది మంచి విషయమే కానీ తాను ఆ ప్రాజెక్ట్లో భాగం కాకపోవచ్చని స్పష్టం చేసింది. మొదటి భాగం చిత్రీకరణ సమయంలో చాలా కష్టపడ్డామని, దాదాపు ఎన్నో రోజుల పాటు కఠినమైన షూటింగ్ అనుభవాన్ని ఎదుర్కొన్నామని తెలిపింది. ఆ అనుభవం వల్ల తనకు నటనలో మంచి పరిణతి వచ్చినప్పటికీ, మళ్లీ అదే తరహా ప్రయాణాన్ని కొనసాగించాలనే ఉద్దేశం లేదని చెప్పింది.
ఈ వ్యాఖ్యలతో అభిమానుల్లో కొత్త సందేహాలు మొదలయ్యాయి. మొదటి భాగంలో కనిపించిన నటీనటులు సీక్వెల్లో ఉంటారా లేదా అన్నది ఇప్పుడు చర్చనీయాంశంగా మారింది. ముఖ్యంగా ధనుష్ సరసన ఎవరు నటిస్తారు? కథ ఎలా ఉండబోతోంది? అనే ప్రశ్నలు ఆసక్తిని రేకెత్తిస్తున్నాయి. మొత్తానికి, యుగానికి ఒక్కడు సీక్వెల్పై అధికారిక ప్రకటన కోసం అభిమానులు ఆసక్తిగా ఎదురుచూస్తుండగా, ఆండ్రియా కామెంట్స్ ఈ ప్రాజెక్ట్పై మరింత హైప్ తీసుకొచ్చాయి.
