సినిమాల్లో స్టైలిష్గా, ధైర్యంగా కనిపించే హీరోలు నిజ జీవితంలో కూడా అలానే ఉంటారని అనుకుంటాం. కానీ వారి జీవితంలో కూడా కనిపించని ఒత్తిళ్లు, భయాలు ఉంటాయని తాజాగా హీరో అడివి శేష్ చెప్పిన మాటలు గుర్తు చేస్తున్నాయి. ప్రస్తుతం తన కొత్త సినిమా ప్రమోషన్స్లో బిజీగా ఉన్న ఆయన, తన వ్యక్తిగత అనుభవాలను షేర్ చేస్తూ అందరినీ ఆశ్చర్యపరిచారు.
తాజాగా ఇచ్చిన ఇంటర్వ్యూలో శేష్ మాట్లాడుతూ షూటింగ్ ప్రారంభానికి ముందు తనకు తీవ్రమైన యాంగ్జెటీ ఉంటుందని వెల్లడించారు. ఆ సమయంలో చాలా టెన్షన్గా, గందరగోళంగా అనిపిస్తుందని చెప్పారు. అలాంటి పరిస్థితుల నుంచి బయటపడేందుకు అరోమా థెరపీ, కళ్ళపై ఐస్ పెట్టుకోవడం వంటి చిన్న చిన్న పద్ధతులు ఉపయోగపడుతున్నాయని తెలిపారు. ముఖ్యంగా ఎమోషనల్ సీన్స్ చేయాల్సి వచ్చినప్పుడు ముందుగానే తన మనసును సిద్ధం చేసుకుంటానని చెప్పడం ఆయన ప్రొఫెషనల్ డెడికేషన్ను తెలియజేస్తుంది.
ఇక ఆయన నటిస్తున్న “డెకాయిట్” సినిమా విషయానికి వస్తే, ఇది ఒక ఆసక్తికరమైన లవ్ స్టోరీగా తెరకెక్కుతోంది. ఈ చిత్రానికి షానీల్ డియో దర్శకత్వం వహించగా, మృణాల్ ఠాకూర్ హీరోయిన్గా నటిస్తున్నారు. అలాగే అనురాగ్ కశ్యప్ కీలక పాత్రలో కనిపించనున్నారు. తెలుగు, హిందీ భాషల్లో ఒకేసారి విడుదల కానున్న ఈ సినిమా ఏప్రిల్ 10న ప్రేక్షకుల ముందుకు రానుంది.
అయితే రిలీజ్ డేట్ దగ్గరపడుతున్నా, ప్రమోషన్స్ విషయంలో పెద్దగా హైప్ కనిపించకపోవడంతో అభిమానులు కొంత అసంతృప్తి వ్యక్తం చేస్తున్నారు. మంచి కంటెంట్ ఉన్న సినిమాలకు సరైన ప్రచారం ఉంటేనే రీచ్ పెరుగుతుందని ప్రేక్షకులు భావిస్తున్నారు. ఇక ముందు రోజుల్లో చిత్రబృందం ప్రమోషన్స్ వేగం పెంచి సినిమాకు మంచి బజ్ తీసుకురావాలని ఆశిస్తున్నారు.
వరుస విజయాలతో మంచి ట్రాక్ రికార్డు కలిగిన అడివి శేష్ అప్ కమింగ్ ప్రాజెక్టులపై ఎప్పుడూ ప్రేక్షకులు ఆసక్తిగా ఎదురు చూస్తుంటారు. మరి “డెకాయిట్” మూవీ ఆడియెన్సును ఎంత వరకు మెప్పిస్తుందో చూడాలి అంటే ఇంకొద్ది రోజులు ఆగాల్సిందే.
