జాతిరత్నాలు (Jathi Ratnalu) సినిమాతో అనుదీప్ (Anudeep Kv) ప్రేక్షకులను నవ్వుల్లో ముంచెత్తిన సంగతి అందరికీ తెలిసిందే. ఆ సినిమా విజయం తరువాత అనుదీప్ చేసిన ప్రాజెక్ట్‌పై విపరీతమైన అంచనాలు ఏర్పడ్డాయి. శివకార్తికేయన్ (Sivakarthikeyan) తో చేసిన ప్రిన్స్ చిత్రం అనుకున్న స్థాయిలో ఆడకపోవడంతో ఆయన కెరీర్‌పై ప్రభావం పడుతుందనుకున్నారు. కానీ, అనుదీప్ తన సొంత శైలి, కామెడీ టైమింగ్ కారణంగా ఫ్యాన్స్ దృష్టిలో తన స్థానాన్ని నిలబెట్టుకున్నారు. ఇప్పటివరకు పలు కథలను కొందరు హీరోలకు వినిపించిన అనుదీప్, విశ్వక్ సేన్‌కు చెప్పిన ఒక కథపై గ్రీన్ సిగ్నల్ పొందాడు.
విశ్వక్ సేన్ తన నటనతో విభిన్నమైన పాత్రలను ప్రయత్నిస్తూ ప్రేక్షకుల మనసును దోచుకుంటున్నాడు. ఈసారి అనుదీప్ చెప్పిన కథ కూడా పూర్తి డిఫరెంట్ గా ఉండటంతో, మొదటి నుంచే ఈ ప్రాజెక్ట్ పై ఆసక్తి చూపినట్లు సమాచారం. కొన్ని మార్పులు, చేర్పుల తర్వాత చివరికి ఈ ప్రాజెక్ట్ అధికారికంగా ప్రారంభం కానుంది. సితార ఎంటర్టైన్మెంట్స్ బ్యానర్ పై రూపొందనున్న ఈ చిత్రం, విశ్వక్ సేన్ (Vishwak Sen) కెరీర్ లో ఒక ప్రత్యేకమైన మూవీగా నిలుస్తుందని టాక్.
గ్యాంగ్స్ ఆఫ్ గోదావరి (Gangs of Godavari) వంటి బోల్డ్ ప్రాజెక్ట్ తర్వాత విశ్వక్ సేన్ మరో వైవిధ్యభరితమైన చిత్రంలో నటించబోతుండటం ఆసక్తి కలిగిస్తోంది. ఈ సినిమా కథలో కామెడీతో పాటు హృదయాలను హత్తుకునే భావోద్వేగాలు ఉంటాయని సమాచారం. ఇక ఈ ప్రాజెక్ట్‌తో అనుదీప్ మరోసారి తన ప్రతిభను నిరూపించుకోవాలని పట్టుదలతో ఉన్నారు.
జాతిరత్నాలు వంటి బ్లాక్ బస్టర్ తర్వాత, ప్రిన్స్ ద్వారా వచ్చిన మిశ్రమ స్పందనను మరచిపోయేలా, ఈ సినిమాతో తన మార్క్ రీఎస్టాబ్లిష్ చేయాలని చూస్తున్నారు. ఈ ప్రాజెక్ట్ అనుదీప్‌కు, విశ్వక్‌కు ఎంతో కీలకమని సినీ వర్గాలు అంటున్నాయి. ఇక చిత్రానికి సంబంధించిన పూర్తి వివరాలు, ఇతర తారాగణం, సాంకేతిక బృందం పేర్లు త్వరలో వెల్లడించనున్నారు.
