దసరా తర్వాత భాగ్ మతిగా మారనున్న దేవసేన

‘బాహుబలి-ది కంక్లూజన్’ తుదిదశకు చేరుకుందని ఇటీవల రాజమౌళి చెప్పుకొచ్చారు. ప్రభాస్ మినహా మిగతా నటీనటులంతా ఒక్కొక్కరుగా ‘మాహిస్మతి’ రాజ్యానికి వీడుకోలు పలికి బయటపడుతున్నారు. తొలిభాగంలో సంకెళ్లకు మాత్రమే పరిమితమైన అనుష్క రెండోభాగంలో కత్తి పట్టి యుద్ధం చేస్తూ, బాహుబలితో ప్రేమలో పడి రెండో భాగాన్ని రక్తి కట్టించనుంది. ఆ రకంగా ‘బాహుబలి2’లో కీలక పాత్ర పోషించిన అనుష్క కూడా తనవంతు చిత్రీకరణను పూర్తి చేసుకుందట. దాంతో ‘భాగ్ మతి’గా మారేందుకు సన్నద్ధమవుతోంది స్వీటీ.

‘పిల్ల జమీందార్’ ఫేమ్ అశోక్ దర్శకత్వంలో అనుష్క ‘భాగ్ మతి’ సినిమాలో నటించనున్న సంగతి తెలిసిందే. కొద్దికాలం క్రితం షూటింగ్ మొదలైన ఈ సినిమా చిత్రీకరణ 25 రోజుల పాటు సాగింది. తర్వాత అనుష్క జక్కన్న సృష్టించిన రాజ్యానికి రావడంతో ఆ సినిమా అక్కడే ఆగిపోయింది. అనుష్క పోలీస్ పాత్రలో నటించనున్న ఈ సినిమా కోసం హైదరాబాద్ లో ప్రత్యేకంగా ఓ సెట్ రూపొందించారు. దసరా తర్వాత ఈ షూటింగ్ నిర్విరామంగా సాగనుందని సమాచారం. తెలుగు తమిళ భాషల్లో ఈ సినిమాని యూవీ క్రియేషన్స్, స్టూడియో గ్రీన్ సంస్థలు నిర్మిస్తున్నాయి. ‘అరుంధతి’, ‘రుద్రమదేవి’ వంటి నాయికా ప్రాధ్యాన్యం గల సినిమాల తర్వాత అనుష్క నటిస్తున్న ఈ సినిమాలో ఆది పినిశెట్టి, మలయాళ నటులు జయరాం, ఉన్ని ముకుందన్ కీలక పాత్రలు పోషిస్తున్నారు.