అంతర్జాతీయ చలన చిత్రోత్సవంలో ప్రదర్శనకు ఎంపికైన బాహుబలి

దర్శకధీరుడు ఎస్.ఎస్.రాజమౌళి సృష్టించిన బాహుబలి మరో అరుదైన గౌరవాన్ని దక్కించుకుంది. జాతీయ ఉత్తమ చిత్రం అవార్డుతో పాటు అనేక ప్రాంతీయ అవార్డులు సొంతం చేసుకున్న ఈ మూవీ దేశంలో ఈ ఏడాదిలో విడుదలయిన గొప్ప చిత్రాల సరసన నిలిచింది. గోవాలో వచ్చే నెల 20 నుంచి 28 వరకు జరుగనున్న అంతర్జాతీయ చలన చిత్రోత్సవం(ఇండియా)లో ప్రదర్శనకు యంగ్ రెబల్ స్టార్ ప్రభాస్ వీరోచితంగా నటించిన బాహుబలి బిగినింగ్ మూవీ ఎంపికయింది.

ఈ ఫెస్టివల్ లో బాజీరావు మస్తానీ, సల్మాన్ ఖాన్ నటించిన సుల్తాన్ వంటి బాలీవుడ్ సినిమాలు కూడా ప్రదర్శించనున్నారు. ప్రపంచంలోని సినీ ప్రముఖులు హాజరయ్యే ఈ ఫెస్టివల్లో ప్రదర్శనకు తమ సినిమా సెలక్ట్ కావడం పై రాజమౌళి బృందం సంతోషం వ్యక్తం చేస్తోంది. ప్రస్తుతం బాహుబలి కంక్లూజన్ చిత్రీకరణలో బిజీగా ఉన్న దర్శకధీరుడు వచ్చేనెల నాటికీ షూటింగ్ ని కంప్లీట్ చేసి చిత్రోత్సవానికి హాజరు కావాలని భావిస్తున్నారు.