తాజాగా విడుదలైన ‘కల్కి’ ట్రైలర్ తో అందరి దృష్టి తన వైపు తిప్పుకున్నాడు డైరెక్టర్ ప్రశాంత్ వర్మ. మరో రెండు రోజుల్లో విడుదల కాబోతున్న ఈ చిత్రం పై అంచనాలు అమాంతం పెరిగిపోయాయి. క్రైమ్ థ్రిల్లర్ నేపథ్యంలో సాగే కథాంశంతో ఈ చిత్రాన్ని తెరకెక్కించాడు ప్రశాంత్ వర్మ. తన మొదటి చిత్రమైన ‘అ!’ తోనే మంచి టేస్ట్ ఉన్న డైరెక్టర్ గా పేరు తెచ్చుకున్నాడు ప్రశాంత్ వర్మ. ఆ చిత్రంలో తన టేకింగ్ గురించి ప్రత్యేకంగా చెప్పనక్కర్లేదు. దీంతో ‘కల్కి’ చిత్రం పై మొదటి నుండీ మంచి అంచనాలే నెలకొన్నాయి. ఇక ఈ చిత్ర ప్రమోషన్ లో భాగంగా బాలయ్య కోసం ఓ అద్భుతమైన సబ్జెక్టు తన దగ్గర ఉన్నట్టు చెప్పుకొచ్చాడు. ప్రశాంత్ ఇలా కామెంట్ చేయడంతో అందరిలోనూ ఆసక్తి పెరిగింది.
ప్రశాంత్ మాట్లాడుతూ.. “గత కొంతకాలంగా అభిమానులు, దర్శకుల వల్ల బాలయ్య మూస బాటలో పడిపోయి రొటీన్ సినిమాలు చేస్తూ వచ్చారు. నాకు అవకాశం వస్తే కని విని ఎరుగని రీతిలో ఆయన క్యాలిబర్ ని పూర్తిగా వాడుకునేలా మూవీ తీస్తాను” అంటూ చెప్పుకొచ్చాడు. ఈ కామెంట్స్ ను గమనించి బాలయ్య ప్రశాంత్ ను కలిసి ఆ కథ వింటే.. బాగుంటుందని అభిమానులు కోరుకుంటున్నారు. ఒక వేళ ఈ కాంబినేషన్ సెట్ అయితే అభిమానులేకే.. మిగిలిన ప్రేక్షకులకి కూడా డిఫరెంట్ బాలయ్యను చూసే అవకాశం దక్కుతుంది. ఇదంతా జరగాలంటే ‘కల్కి’ మంచి హిట్టవ్వాలి. అప్పుడే బాలయ్య ఈ యంగ్ డైరెక్టర్ ను కలిసే అవకాశం ఉంటుంది. దీనికోసమే ‘కల్కి’ సినిమా హిట్టవ్వాలని బాలయ్య అభిమానులు కూడా ఆశిస్తున్నారు.
Home