Shankar, Ram Charan: రామ్‌చరణ్‌ కోసం మైండ్‌ బ్లోయింగ్‌ ఎంట్రీ సీన్‌ రెడీ!

July 6, 2022 / 08:31 PM ISTByFilmy Focus

Join Us

Shankar, Ram Charan: రామ్‌చరణ్‌ కోసం మైండ్‌ బ్లోయింగ్‌ ఎంట్రీ సీన్‌ రెడీ!

‘‘ఒక్కొక్కరిని కాదు షేర్‌ ఖాన్‌.. వంద మందిని ఒకేసారి రమ్మను’’ అని ‘మగధీర’లో రామ్‌చరణ్‌తో చెప్పించారు రాజమౌళి. ఆ తర్వాత ‘ఆర్‌ఆర్ఆర్‌’ వేల మంది మధ్యలోకి (విజువల్‌ ఎఫెక్ట్స్‌లోనే అనుకోండి) రామ్‌చరణ్‌ ఓ వ్యక్తిని పట్టుకునే సీన్‌ చేశారు. అది ఫైట్‌లానే ఉంటుంది. అయితే ఫైట్‌ కాదు. కానీ ఇప్పుడు శంకర్‌ తన సినిమాలో రామ్‌చరణ్‌.. వెయ్యి మందికి పైగా రౌడీలను ఎదుర్కొనే సీన్‌ తీస్తున్నారట. ప్రస్తుతం టాలీవుడ్‌లో ఇదే విషయంలో చర్చ నడుస్తోంది.

శంకర్‌ – రామ్‌చరణ్‌ల కొత్త సినిమా కొత్త షెడ్యూల్‌ త్వరలో ప్రారంభమవుతుందట. హైదరాబాద్‌లోని ఓ స్టూడియోలో ప్రత్యేకంగా సెట్స్‌ వేసి మరీ ఈ ఫైట్‌ తీస్తారట. సినిమాలో రామ్‌చరణ్‌ ఎంట్రీ సీన్‌ కూడా ఇదే అవుతుంది అని చెబుతున్నారు. దీని కోసం సుమారు 1200 మంది ఫైటర్స్‌ను హైదరాబాద్‌లో సిద్ధం చేస్తున్నారట. అంతమందితో ఆ ఫైట్‌ భారీగా ఉంటుందని చెబుతున్నారు. ‘అపరిచితుడు’, ‘రోబో’, ‘2.0’లో కూడా ఇలాంటి సీన్స్‌ మనం చూడొచ్చు. అయితే ఇప్పుడు చరణ్‌ సినిమాలో ఆ సీన్స్‌ ఇంకా హైలైట్‌ అవుతాయి అంటున్నారు.

దిల్‌ రాజు నిర్మాణంలో రూపొందుతున్న ఈ సినిమా బడ్జెట్‌ బాగా పెరిగిపోయిందని వార్తలొస్తున్నాయి. మరోవైపు శంకర్‌ మాత్రం భారీతనం విషయంలో ఎక్కడా వెనక్కి తగ్గడం లేదు. ఇప్పుడు ఈ ఫైట్‌ కూడా అలాంటిదే అని చెబుతున్నారు. ఈ సినిమాతో మరోసారి నాటి శంకర్‌ను చూస్తాం అనే మాటలు కూడా వినిపిస్తున్నాయి. అతని భారీతనం, బలమైన కథ, యువతను ప్రేరేపించే కాన్సెప్ట్‌ ఈ సినిమాలో చూడొచ్చు అని చెబుతున్నారు. ఇందులో భాగంగా 20 రోజుల పాటు హైదరాబాద్‌లోనే ఈ షూట్ ఉంటుందట.

ఇదిలా ఉండగా త్వరలో పంజాబ్‌లోని అమృత్‌సర్‌లో తెరకెక్కించబోయే పాట గురించి కూడా చెబుతున్నారు. అందులో పెద్ద ఎత్తున డ్యాన్సర్లను తీసుకెళ్తున్నారట. వెయ్యి మందికిపైగా డ్యాన్సర్లతో గణేశ్‌ ఆచార్య మాస్టర్‌ ఈ పాటను రూపొందిస్తారట. 2023 వేసవిలో సినిమాను రిలీజ్‌ చేయడానికి ప్లాన్ చేశారట.