టాలీవుడ్‌లో టైర్‌ 1 హీరోలు, టైర్‌ 2 హీరోలు ఉంటారు అని మీకు తెలుసా? మనకు తెలిసినంతవరకు స్టార్‌ హీరోలు, యంగ్‌ హీరోలే. అయితే ఇంకా మన సీనియర్‌ హీరోలు నటిస్తుండటం, కుర్ర హీరోలకు పోటీ ఇస్తుండటంతో సీనియర్‌ స్టార్‌ హీరోలు అని అంటున్నారు. అయితే టైర్‌ 1 హీరోలు, టైర్‌ 2 హీరోలు అనే కాన్సెప్ట్‌ ఉందంటూ, అందులోకి నాని (Nani) వచ్చేశాడు అంటూ గత రెండు, మూడు రోజులుగా పెద్ద ఎత్తున చర్చ జరుగుతోంది.
ఆ టైర్ల సంగతేమో కానీ.. దాని గురించి నాని చెప్పిన సమాధానం అయితే ఇప్పుడు సోషల్‌ మీడియాలో వైరల్‌గా మారింది. నాని హీరోగా నటించిన ‘సరిపోదా శనివారం’ (Saripodhaa Sanivaaram) సినిమా ఈ గురువారం వచ్చి మంచి విజయాన్ని అందుకుంది. దీంతో నాని టైర్‌ 1 హీరోల లిస్ట్‌లోకి వచ్చేసినట్లే అని చర్చ మొదలైంది. ఇదే మాట నాని దగ్గర ప్రస్తావిస్తే ఆసక్తికర సమాధానం ఇచ్చాడు. అసలు ఆ గోల నాకొద్దు అంటూ స్టేట్‌మెంట్‌ ఇచ్చాడు.
అసలు ఈ చర్చ ఎందుకొచ్చింది అంటే.. జయాపజయాలతో సంబంధం లేకుండా చేసిన సినిమాలు నష్టాలు తీసుకురాకుండా, కనీసం ప్రామిసింగ్‌ విజయాలు అందుకుంటే టైర్‌ 1 హీరోలు అని అంటుంటుంటారట. ఈ లెక్కన నాని ‘దసరా’ (Dasara) , ‘హాయ్ నాన్న’ (Hi Nanna) .. ఇప్పుడు ‘సరిపోదా శనివారం’తో హ్యాట్రిక్ హిట్లు కొట్టాడు. దీంతో టైర్‌ 1లోకి వచ్చేసినట్లే అని అంటున్నారు. అయితే నాని లెక్క వేరేలా ఉంది.
‘‘దయచేసి అలాంటి పేర్లు పెట్టకండి. ఎవరు మొదలుపెట్టారో, ఎందుకు ప్రారంభించారో తెలియదు. అసలు నాకు సంబంధం లేని విషయం గురించి ప్రశ్న నన్ను అడిగితే ఎలా. మీరు క్రియేట్ చేశారు, అదే ముందుకు వెళ్తుంది.. అంతేకానీ నాకు సంబంధం లేదు. ఈ గోల నుండి నన్ను వదిలేయండి’’ అని క్లారిటీ ఇచ్చేశాడు నాని. మరి ఈ చర్చ ఆగుతుందో కొత్త టర్న్‌ తీసుకుంటుందో చూడాలి.
