హలో వేడుకలో తాను ఏడవలేదన్న సమంత

విక్రమ్ కె కుమార్ దర్శకత్వంలో అక్కినేని ప్రిన్స్ అఖిల్‌ నటించిన చిత్రం ‘హలో’. అన్నపూర్ణ స్టూడియో బ్యానర్లో అక్కినేని నాగార్జున నిర్మించిన ఈ మూవీ ప్రీ రిలీజ్‌ వేడుక బుధవారం హైదరాబాద్‌లో జరిగింది. ఈ వేడుకకు అక్కినేని కుటుంబ సభ్యులతో పాటు మెగాస్టార్‌ చిరంజీవి, రామ్‌చరణ్‌ కూడా హాజరయ్యారు. అఖిల్‌ మెగాస్టార్ ని పెదనాన్న, రామ్ చరణ్ ని అన్నయ్య అంటూ పిలిచి తమ మధ్య అనుబంధాన్ని వెల్లడించారు. ఇక ఈ వేడుకలో నాగార్జున.. తన పెద్ద కుమారుడు నాగచైతన్య గురించి మాట్లాడుతూ.. “చైకు ఉన్న మంచి మనసు నాకే కాదు… ఎవ్వరికీ లేదు” అన్నారు. అది విని అభిమానులు కేకలు వేశారు.

ఆ సమయంలో సమంత కళ్లు తుడుచుకుంది. అప్పుడు సమంత ఏడ్చిందని ఆమె అభిమాని ట్విటర్‌ ద్వారా వెల్లడిస్తూ “నిజమైన ప్రేమంటే ఇదే” అని నాగ్‌ మాట్లాడుతున్న వీడియోను పోస్ట్‌ చేశాడు. ఈ ట్వీట్‌ చూసిన సమంత వెంటనే స్పందించారు. “అయ్యో.. ఆ సమయంలో నేను ఏడవలేదు. కళ్లకు ఇన్‌ఫెక్షన్‌ సోకింది. అందుకే తుడుచుకున్నా” అని దండం పెడుతున్న ఇమోజీలు పోస్ట్‌ చేశారు. అయినా అభిమానులు నమ్మడం లేదు. ఇక సినిమా విషయానికి వస్తే హలో మూవీపై అఖిల్ ఎన్నో ఆశలు పెట్టుకున్నారు. కల్యాణి ప్రియదర్శన్ హీరోయిన్ గా నటిస్తున్న ఈ రొమాంటిక్ థ్రిల్లర్ ఏవిధంగా ఉంటుందో కొన్ని గంటల్లో తెలియనుంది.