బిగ్ బాస్ హోస్టింగ్ పై నాని స్పందన

స్టార్ మా ఛానల్ వాళ్లు నిర్వహించిన బిగ్ రియాలిటీ షో బిగ్ బాస్ సీజన్ వన్ సూపర్ హిట్ అయింది. ఈనెల 10 నుంచి “బిగ్‌బాస్‌” సీజన్‌ 2 ప్రారంభం కాబోతోంది. ఈసారి హోస్ట్ గా “నేచురల్‌ స్టార్‌” నాని వ్యవహరించనున్నారు. ఈ సందర్భంగా మీడియా సమావేశంలో నాని అనేక ప్రశ్నలకు ఆసక్తికర సమాధానాలు చెప్పారు. మొదటి సీజన్ కి ఎన్టీఆర్.. హోస్ట్ గా వ్యవహరించారు కదా? అతన్ని కలిసి ఏమైనా సలహాలు తీసుకున్నారా? అని అడగ్గా.. అందుకు నాని స్పందిస్తూ .. “మహానటి సినిమా వేడుకలో తారక్‌ను కలిశా. ఆ తర్వాత సరదాగా ఆయన ఇంటికి వెళ్లా. స్టేజ్‌ మీద మనం మనలా ఉంటే చాలు అనుకున్నాం.

అయితే సీజన్ వన్ నేను చూడలేదు. ఇప్పుడు తారక్‌ ఎపిసోడ్‌లు అన్ని చూస్తానని అతనికి మాట ఇచ్చాను’’ అని అన్నారు. బిగ్ బాస్ షో లో సల్మాన్‌, ఎన్టీఆర్‌ ఒక మార్క్‌ని క్రియేట్‌ చేశారు. వారిలో మీరు ఎవర్ని ఫాలో అవ్వాలి అనుకుంటున్నారు? అని ప్రశ్నించగా.. తాను ఎవర్నీ ఫాలో అవ్వనని, తనకి నచ్చినట్లు చేసుకుంటూ పోతానని స్పష్టం చేశారు. అలాగే ఈ షో ద్వారా పక్కింటి కుర్రాడి ఇమేజ్‌ పెరుగుతుందని భావిస్తాన్నారా? అనే ప్రసన్నకు ‘‘పదేళ్ల నుంచి పక్కింటి కుర్రాడు అంటున్నారు.. ఇప్పుడు ప్రమోషన్‌ వచ్చింది. పక్కింటి నుంచి మీ ఇంట్లోకి వస్తాను. మీ ఇంట్లోనే మూడున్నర నెలలు ఉండబోతున్నాను” అని బదులిచ్చారు. ప్రస్తుతం తాను మూడు సినిమాలకు సైన్ చేసినట్లు, ఈ షో వల్ల ఆ చిత్రాలకు ఎటువంటి ఇబ్బంది కలగదని స్పష్టం చేశారు.