శుభాకాంక్షలు, పెద్దరికం, శుభలగ్నం.. వంటి కుటుంబ కథ చిత్రాల్లో నటించి ఫ్యామిలీ హీరోగా పేరు తెచ్చుకున్న జగపతిబాబు.. లెజెండ్ సినిమాతో విలన్ అవతారమెత్తారు. ఆ తర్వాత విభిన్నమైన పాత్రలను చేసి క్యారక్టర్ ఆర్టిస్టుగాను మంచి పేరు తెచ్చుకున్నారు. రీసెంట్ గా రంగస్థలం సినిమాలోనూ అదరగొట్టారు. ప్రస్తుతం అతను విలన్ గా నటించిన చిత్రం “సాక్ష్యం”. బెల్లంకొండ శ్రీనివాస్‌, పూజాహెగ్డే జంటగా నటించిన ఈ చిత్రం శ్రీవాస్‌ దర్శకత్వంలో రూపుదిద్దుకుంటోంది. అభిషేక్‌ పిక్చర్స్‌ పతాకంపై అభిషేక్‌ నామా నిర్మిస్తున్న “సాక్ష్యం” చిత్రానికి హర్షవర్ధన్‌ రామేశ్వర్‌ సంగీతాన్ని అందించారు. ఈ పాటలు రిలీజ్ అయి విశేషంగా ఆకట్టుకుంటున్నాయి.
త్వరలోనే థియేటర్లోకి రానున్న ఈ మూవీలో తన పాత్ర గురించి జగపతిబాబు వెల్లడించారు. “ఫ్యామిలీ హీరోనైన నేను ఇటీవలి కాలంలో విలన్‌గా నటిస్తున్నాను. తాజాగా “సాక్ష్యం” సినిమాలో కూడా విలన్ రోల్ పోషించాను. ఈ సినిమాలో విలన్ చాలా క్రూరుడు. ప్రపంచంలో ఇంత కంటే నీచుడు ఉండడు. ఇప్పటివరకు నేను పోషించిన విలన్ పాత్రల్ని ప్రేక్షకులు క్షమించారు. కానీ, ఈ సారి మాత్రం క్షమించరు. వీడు చాలా పెద్ద వెధవ. అతనికి డబ్బు తప్ప మరేది ముఖ్యం కాదు” అని చెప్పారు. జగ్గూభాయ్ చెప్పిన విధానం చూస్తుంటే తన నటనతో భయపెట్టించడం ఖాయమనిపిస్తోంది.
