తెలుగు చిత్ర పరిశ్రమలో మెగా హీరోగాలు, నందమూరి హీరోల మధ్య ఆరోగ్యకరమైన పోటీ ఉంది. ఆ రెండు కుటుంబాలకు పెద్ద ఫ్యాన్ ఫాలోయింగ్ ఉంది. అందుకే దర్శకులు, నిర్మాతలు మెగా, నందమూరి హీరోల మల్టీ స్టారర్ మూవీ తీయాలని అనేకసార్లు ప్రయత్నించి విఫలమయ్యారు. రీసెంట్ గా దర్శకుడు రవికుమార్ చౌదరి ఆ ప్రయత్నంలో విజయవంతమయ్యారని వార్తలు వినిపించాయి. ప్రముఖ నిర్మాత కె.ఎస్.రామారావు భారీ బడ్జెట్ తో నిర్మించడానికి ముందుకొచ్చిన ఈ చిత్రంలో మెగా హీరో సాయి ధరమ్ తేజ్, నందమూరి హీరో కళ్యాణ్ రామ్ స్క్రీన్ ని షేర్ చేసుకోనున్నట్లు తెలిసింది.
ఈ వార్త అటు మెగా అభిమానులు, ఇటు నందమూరి ఫ్యాన్స్ లో ఆనందాన్ని కలిగించాయి. అయితే తాజాగా ఆ ప్రాజక్ట్ ఆగిపోయిందని ఫిలిం నగర్ వాసులు చెప్పుకుంటున్నారు. ఈ సినిమా ఆగిపోవడానికి స్క్రిప్ట్ బాగా లేకపోవడమే ప్రధాన కారణమని కొంతమంది చెబుతుండగా.. మరికొంతమంది ఆ రెండు కుటుంబాల మధ్య ఉన్న వృత్తి పరమైన విభేదాలే కారణమని అంటున్నారు. ఎవరి మాటల్లో ఎంత నిజం ఉందో చెప్పలేము కానీ.. నందమూరి, మెగా హీరోల మల్టీస్టారర్ సినిమా మాత్రం ఆగిపోయినట్టేనని స్పష్టంగా అర్ధమవుతోంది.
