తక్కువ చిత్రాలకే స్టార్ హీరోయిన్ హోదా అందుకున్న నటి కీర్తి సురేష్. తెలుగులో నేను శైలజ, నేను లోకల్ సినిమాలతో స్టార్ హీరోయిన్స్ కి గట్టి పోటీ ఇచ్చింది. అజ్ఞాతవాసి సినిమాలోను మంచి మార్కులు అందుకుంది. టాలీవుడ్ లోనే కాకుండా తమిళంలోనూ రెమోతో సూపర్ హిట్ అందుకుంది. ఇప్పుడు విక్రమ్ తో సామి 2, విశాల్ తో శాండాకోజి2(పందెంకోడి 2 ), తలపథి 2 అనే మూడు తమిళ సినిమాలు చేస్తోంది. ఇవి సెట్స్ పైన ఉండగా.. మరో మూవీ రిలీజ్ కి సిద్ధంగా ఉంది. అదే సావిత్రి బయోపిక్ మూవీ మహానటి. ఇందులో కీర్తి సావిత్రిగా నటించింది. మే 9న ప్రేక్షకుల ముందుకు రానుంది.
ఈ సందర్భంగా మీడియా ముందుకు వచ్చిన కీర్తి చిన్ననాటి సంగతులు గుర్తుకు తెచ్చుకుంది. అప్పటి అలవాటు ఇప్పుడు ఉపయోగపడిందని వెల్లడించింది. ‘‘చిన్నప్పుడు అందరిలానే నేనూ బాగా ఆల్లరి చేసేదాన్ని. అవన్నీ తలచుకుంటే ఇప్పటికీ నవ్వొస్తుంటుంది. అందరితో కలివిడిగా ఉండడం చిన్నప్పటి నుంచీ అలవాటు. సినిమాల్లోకి వచ్చాక అది బాగా పనికొచ్చింది. నాకు సంబంధం లేని చిత్రసీమలోనూ నాకంటూ ఓ గుర్తింపు తెచ్చుకోగలిగాను’’ అని కీర్తి చెప్పింది. మహానటి సినిమాతో కీర్తి సురేష్ రెండు భాషల్లోను మరిన్ని అవకాశాలు అందుకుంటుందని సినీవిశ్లేషకులు అంచనా వేస్తున్నారు.
