ప్రభాస్ నా మాట వింటున్నాడు

యంగ్ రెబల్ స్టార్ ప్రభాస్ చిన్నప్పటి నుంచి పెదనాన్న కృష్ణం రాజు మాట వింటున్నారు. అతని ప్రోత్సాహంతోనే చిత్ర పరిశ్రమలో ఇండియన్ స్టార్ గా ఎదిగారు. మరి అటువంటిది కొత్తగా ప్రభాస్ కృష్ణంరాజు మాట వినటమేంటని అందరికీ డవుట్ రావచ్చు.. అలా ఎందుకు అన్నారో ఇప్పుడు తెలుసుకుందాం. రెబల్ స్టార్ కృష్ణంరాజు తనపుట్టినరోజు సందర్భంగా మీడియా ముందుకు వచ్చారు. ఫ్యూచర్ ప్రాజెక్ట్స్ గురించి, విలేకరులు అడిగిన ప్రశ్నలకు సమాధానమిచ్చారు. వీటిలో ప్రభాస్ గురించి చెప్పినవి ఆసక్తికరంగా మారాయి. “ఇదివరకు ప్రభాస్ తో పెళ్లి ప్రస్తావన తెస్తే చాలు ఆమడదూరం పారిపోయేవాడు. ఇప్పుడు అతని ఆలోచన మారింది. పెళ్లి అంటే కాస్త ఆలోచిస్తున్నాడు. ” అని కృష్ణం రాజు చెప్పారు “పెళ్లి విషయంలో ఇప్పుడు నా మాటకు విలువిస్తున్నాడు” అని కృష్ణంరాజు చమత్కరించారు. . “అయితే పెళ్లికి సరే అన్నమాట ప్రభాస్ నోటి నుంచి ఇంకా రాలేదు… వచ్చిన వెంటనే నేను పనులు మొదలు పెడతాను.

అమ్మాయిల్ని వెదకడం లేదని ప్రభాస్ వచ్చి అడిగినప్పడు మాత్రమే సంబంధాలు చూస్తాను” అని స్పష్టం చేశారు. ఈ ఏడాది ప్రభాస్ ఓ ఇంటివాడు అయ్యే సూచనలు కనిపిస్తున్నాయని వివరించారు. ఇంకా ప్రభాస్ బాలీవుడ్ ఎంట్రీ గురించి కూడా సెటైర్ వేశారు. “ప్రస్తుతం ప్రభాస్ సాహో చేస్తున్నాడు. దీని తర్వాత నా బ్యానర్లో సినిమా చేస్తాడని మాట ఇచ్చాడు. అయితే ప్రభాస్ సాహో తర్వాత బాలీవుడ్ ఎంట్రీ ఉందని వార్తలు చదువుతున్నాను. ఈ విషయం ప్రభాస్ నాకు చెప్పలేదు. నా బ్యానర్లో సినిమా ఎప్పుడు చేస్తాడో” అంటూ చెప్పి నవ్వేశారు. బిడ్డ ఎదుగుతుంటే ఎవరికీ మాత్రం ఆనందముండదు చెప్పండి. అదే ఆ నవ్వులోని అర్ధం.