M4M Review in Telugu: M4M సినిమా రివ్యూ & రేటింగ్!

నటీనటుల పనితీరు: సంబీత్ ఆచార్య ఓ ఒడియా యాక్టర్. తెలుగులో సినిమాలు చేశాడు కానీ ఇప్పటివరకు అతనికి గుర్తింపు రాలేదు. అయినప్పటికీ ‘M4M’ తో తన అదృష్టాన్ని మరోసారి పరీక్షించుకునేందుకు ప్రేక్షకుల ముందుకు వచ్చాడు. ఏసీపీ కృష్ణ పాత్రలో అతను సెట్ అయ్యాడు. కానీ నటన పరంగా ఏమాత్రం మెప్పించలేదు. ఇతని పాత్రకి ఎలివేషన్స్ ఇచ్చే స్కోప్ ఉన్నా.. దర్శకుడు ఎందుకో ఆ ఛాన్స్ తీసుకోలేదు అనిపిస్తుంది. ఇన్వెస్టిగేషన్ ప్రాసెస్ అంతా హీరోయిన్ జో శర్మకే అప్పగించి.

ఇతన్ని ఫోన్ కాల్స్ మాట్లాడటానికి మాత్రమే పరిమితం చేశారు. పోనీ జో శర్మ అయినా తన నటనతో మెప్పించిందా అంటే అలాంటిదేమీ లేదు. ఆమె పాత్రకి లిప్ సింక్ కూడా సెట్ అవ్వలేదు. ఎక్స్ప్రెషన్స్ పలికించలేకపోయింది. మరోవైపు కీలక పాత్రలు చేసిన శుభలేఖ సుధాకర్, గీతా భాస్కర్(తరుణ్ భాస్కర్ తల్లి) వంటి వారు తమ పాత్రలకి న్యాయం చేశారు. ముఖ్యంగా గీతా భాస్కర్ నుండి ఇలాంటి పాత్ర ఎవ్వరూ ఊహించలేరు. ఇప్పటివరకు ఆమె చేసిన పాత్రల్లో ఇది మాత్రం ప్రత్యేకంగా నిలుస్తుంది అనడంలో ఎటువంటి సందేహం లేదు.

సాంకేతిక నిపుణుల పనితీరు: దర్శకుడు మోహన్ వడ్లపట్ల గతంలో ‘మెంటల్ కృష్ణ’ ‘కలవరమాయే మదిలో’ వంటి విభిన్నమైన సినిమాలు నిర్మించారు. ఆయన దర్శకుడిగా మారి చేసిన సినిమా ఇది. థ్రిల్లర్ సినిమాలు అనేసరికి కొన్ని కాలిక్యులేషన్స్ ఉంటాయి. ఆడియన్స్ కూడా వాటికి ఫిక్స్ అయిపోయారు. సస్పెన్స్, డ్రామా, ట్విస్టులు, థ్రిల్లింగ్ ఎలిమెంట్స్.. ఇవన్నీ సరితూగినప్పుడే థ్రిల్లర్ సినిమాలు బాక్సాఫీస్ వద్ద వర్కౌట్ అవుతాయి. వరల్డ్ సినిమా చూడటం మొదలుపెట్టిన తర్వాత ఆడియన్స్ బాగా షార్ప్ అయిపోయారు. సినిమాలో నెక్స్ట్ వచ్చే సన్నివేశాలు వాళ్ళు ముందుగానే అంచనా వేయడంలోనే కాదు…ట్విస్టులను సైతం ముందే పసిగట్టేస్తున్నారు. అలాంటప్పుడు వాళ్ళని మెప్పించడానికి దర్శకుడు ఏ రేంజ్లో మెదడు పెట్టాలి? కథనంలో ఏ రేంజ్ చిక్కు ముడులు వేసుకోవాలి? ఆ చిక్కుముడులు విప్పే టైంలో డ్రామా ఏ రేంజ్లో పండాలి.? అలాంటి విషయాలపై దర్శకుడు దృష్టి పెట్టలేదు.

ఐడియా పరంగా ఓకె. కానీ ఎగజిక్యూషన్ విషయంలో ఫస్ట్ సీన్ నుండి కథనం చాలా లేజీగా, ప్రెడిక్టబుల్ గా సాగుతున్న ఫీలింగ్ ప్రేక్షకులకు కలుగుతుంది.సెకండాఫ్ కోసం దాచిన సస్పెన్స్ ఆసక్తికరంగా లేదు. క్లైమాక్స్ లో కథనంతో ట్రావెల్ కాని ఒక పాత్రని తీసుకొచ్చి అతనే కిల్లర్ అంటే ఆడియన్స్ ఎలా యాక్సెప్ట్ చేస్తారు.? పోనీ అతను అంత క్రూయల్ గా మర్డర్స్ చేయడానికి గల మోటివ్ ని కూడా గొప్పగా వివరించారా? అదీ లేదు. సింపుల్ గా ఓ డిసార్డర్ పేరు చెప్పి మమ అనిపించేశారు. ‘M4M’ విషయంలో జరిగిన మిస్టేక్స్ ఇవే. ప్రొడక్షన్ వాల్యూస్ కూడా చెప్పుకోదగిన విధంగా లేవు. సింగిల్ కెమెరాతో లాగించేసినట్టు ఉన్నారు. అలాగే సీన్ కి సీన్ కి మధ్య వచ్చే సడన్ జంప్స్ వంటివి కూడా ఆడియన్స్ మూడ్ ను డిస్టర్బ్ చేస్తాయి. రన్ టైం గంటన్నరే ఉన్నప్పటికీ 3 గంటల పాటు సీట్లలో కూర్చున్న ఫీలింగ్ ఆడియన్స్ కి కలిగింది అంటే అది స్క్రీన్ ప్లే లోపమే అని చెప్పడంలో అనుమానం అవసరం లేదు.

విశ్లేషణ: సస్పెన్స్ థ్రిల్లర్ లేదా క్రైమ్ ఇన్వెస్టిగేషన్ థ్రిల్లర్ సినిమాలకి ఎప్పుడూ మంచి డిమాండ్ ఉంటుంది. అయితే వాటిలో గ్రిప్పింగ్ నెరేషన్, థ్రిల్లింగ్ ఎలిమెంట్స్ వంటివి సమపాళ్లలో ఉండాలి. అవి మిస్ అవ్వడం వల్లనే ‘M4M’ ఓ వృధా ప్రయత్నంగా మిగిలిపోతుంది అని చెప్పాలి.

ఫోకస్: మోటివ్ మిస్ అయిన మూవీ

రేటింగ్: 1/5