బ్లాక్ బస్టర్ కాంబినేషన్ రెడీ!

December 2, 2020 / 03:46 PM ISTByFilmy Focus

Join Us

‘భలే భలే మగాడివోయ్’ సినిమా బాక్సాఫీస్ వద్ద ఎంత పెద్ద సక్సెస్ అయిందో తెలిసిందే. ఆ సినిమాతో హీరో నాని, దర్శకుడు మారుతీల రేంజ్ మారిపోయింది. ఈ సినిమా రూ.50 కోట్లకు పైగా గ్రాస్ వసూళ్లు చేసి షాక్ ఇచ్చింది. ఈ బ్లాక్ బస్టర్ కాంబినేషన్ లో మరో సినిమా వస్తుందేమోనని ప్రేక్షకులు ఎదురుచూస్తున్నారు. ఎట్టకేలకు ఈ కాంబో సెట్ అయినట్లు తెలుస్తోంది. గతేడాది ‘ప్రతిరోజు పండగే’ సినిమాతో సూపర్ హిట్ కొట్టిన దర్శకుడు మారుతి.. తన తదుపరి సినిమా రవితేజతో చేయాలనుకున్నాడు.

యువి క్రియేషన్స్ బ్యానర్ లో ఈ సినిమా సెట్ అయినట్లు కనిపించింది. కానీ ఇప్పుడు ఈ ప్రాజెక్ట్ సెట్ కాలేదని అంటున్నారు. రవితేజ ఈ సినిమా నుండి తప్పుకున్నట్లు సమాచారం. ఆయన కోసం రాసుకున్న ఎంటర్టైనింగ్ సబ్జెక్టు కోసం ఏ హీరోని తీసుకుందామా..? అని ఆలోచించి నాని దగ్గర ఆగాడట మారుతి. నిజానికి నానికి కూడా మారుతితో సినిమా చేయాలని ఉంది. కానీ ఇతర కమిట్మెంట్ల కారణంగా ఇంతకముందు మారుతితో చేయడం కుదరలేదు.

ఇప్పుడు కూడా నాని లిస్ట్ లో చాలా సినిమాలు ఉన్నాయి. ప్రస్తుతానికి మూడు సినిమాలను లైన్ లో పెట్టాడు. కానీ వీలు చూసుకొని మారుతితో సినిమా చేయాలని నాని ప్లాన్ చేస్తున్నాడు. మారుతి కూడా మధ్యలో వేరే సినిమా తీసినా.. తన దగ్గర రెడీగా ఉన్న స్క్రిప్ట్ మాత్రం నానితోనే చేయాలని ఫిక్స్ అయ్యాడట. అంటే మొత్తానికి ఆలస్యమైనా.. ఈ కాంబినేషన్ లో సినిమా రావడం మాత్రం ఖాయమని తెలుస్తోంది!