శ్రీజ పెళ్లి సందడి మొదలైంది

ప్రముఖ కథానాయకుడు చిరంజీవి ఇంట్లో పెళ్లి బాజాలు మోగాయి. చిరంజీవి రెండో కుమార్తె శ్రీజ పెళ్లి కూతురైన ఫోటోలను గురువారం అల్లు శిరీష్, వరుణ్ తేజ్ లు సోషల్ మీడియాలో అభిమానులతో పంచుకున్నారు. చిరు దంపతులతో పాటు అల్లు అర్జున్, అల్లు స్నేహ, నిహారిక, రామ్ చరణ్ భార్య ఉపాసన తదితర కుటుంబ సభ్యులు ఈ ఫోటోలలో ఉన్నారు. “శ్రీజ కల్యాణం. పెళ్లి సంబరాలు మొదలయ్యాయి. మా ఇంట్లో పెళ్లి కుమార్తె వేడుక జరిగింద”ని అల్లు శిరీష్ పేర్కొన్నారు.

“అందమైన పెళ్లి కూతురు. నా సోదరి పెళ్లి సందడి మొదలైంది” అని వరుణ్ తేజ్ ట్వీట్ చేశారు. ఇప్పటివరకూ మెగా కుటుంబం అధికారికంగా ప్రకటించనప్పటికీ.. శ్రీజ వివాహం సంగతులు ఒక్కొక్కటిగా బయటకు వస్తున్నాయి. చిత్తూరుకు చెందిన ప్రముఖ వ్యాపారవేత్త కెప్టెన్ కిషన్ కుమారుడు కళ్యాణ్, శ్రీజల పెళ్లి మరో మూడు రోజుల్లో.. మార్చి 28న జరుగుతుందనే సంగతి అందరికీ తెలిసిందే. ఉదయం 9:18 గంటలకు పెళ్లి ముహూర్తం నిశ్చయించారు.

బెంగుళూరులోని చిరంజీవి వ్యవసాయ క్షేత్రం(ఫాం హౌస్) పెళ్లి వేడుకకు ముస్తాబయిందని సమాచారం. ఇరువురి కుటుంబ సభ్యులు.. అతికొద్ది మంది సన్నిహితులు మాత్రమే పెళ్లికి హాజరవుతారట. ఎక్కువమందిని ఆహ్వానించలేదని సమాచారం. మార్చి 31న హైదరాబాద్ లోని ఓ ప్రముఖ నక్షత్రాల హోటల్ లో పెళ్లి రిసెప్షన్ ఏర్పాటు చేస్తున్నారట. రిసెప్షన్ ఆహ్వాన పత్రికలు సోషల్ మీడియాలో దర్శనం ఇస్తున్నాయి. గత కొన్ని రోజులుగా మెగా కుటుంబం అంతా పెళ్లి పనుల్లో నిమగ్నమైంది.

And the wedding celebrations begin! Pelli kooturu function at my house. #SreejaKalyanam #p… https://t.co/8g7elhIaex pic.twitter.com/9KoyOLxfXY

— Allu Sirish (@AlluSirish) March 24, 2016