అత్తాకోడళ్ళు కాబోతున్న హీరోయిన్లు?

అవును సీనియర్ హీరోయిన్ స్నేహ అలాగే… మెహ్రీన్ అత్తా కోడలు కాబోతున్నారట. అయితే రియల్ లైఫ్ లో కాదండోయ్… రీల్ లైఫ్ లో..! కోలీవుడ్ స్టార్ ధనుష్ హీరోగా తెరకెక్కుతున్న తాజా చిత్రం ‘పటాస్’. ధనుష్ పుట్టిన రోజు కావడంతో ఈ ఈ చిత్రం నుండీ ఓ పోస్టర్ ను విడుదల చేశారు. చాన్నాళ్ళ తరువాత ధనుష్ ఓ పక్కా కమర్షియల్ మూవీ చేస్తున్నట్టు ఈ పోస్టర్ చూస్తే స్పష్టమవుతుంది. ఇక ఈ చిత్రంలో ధనుష్ డబుల్ రోల్ చేస్తున్నాడు. ఒక పాత్రలో తండ్రిగా… మరో పాత్రలో కొడుకుగా ధనుష్ కనిపించబోతున్నాడు.

ఇక ధనుష్ తండ్రి పాత్రకు హీరోయిన్ గా స్నేహా నటిస్తుండగా, కొడుకు పాత్రకు హీరోయిన్ గా మెహ్రిన్ నటించబోతుంది. గతంలో ధనుష్ ‘ధూల్ పేట’ చిత్రంలో హీరోయిన్ గా నటించింది స్నేహ. ఇక ధనుష్ తో మెహ్రిన్ కలిసి నటించడం ఇదే మొదటిసారి.. అలాగే ‘మెహ్రీన్’ కు ఇదే మొదటి తమిళ చిత్రం. గత కొంతకాలం నుండీ మెహ్రీన్ కోలీవుడ్ ఎంట్రీ ఇవ్వబోతుందని ప్రచారం జరుగుతుంది. ఇప్పుడు ఆ ప్రచారం నిజమే అని తేలింది. మరి తన మొదటి తమిళ చిత్రంతో ఎలాంటి ఫలితాన్ని అందుకుంటుందో చూడాలి.