నాగచైతన్య ఏ ముహూర్తాన “సాహసం శ్వాసగా సాగిపో” సినిమా మొదలెట్టాడో గానీ విడుదలలో జాప్యం “ఆటోనగర్ సూర్య” సినిమాని గుర్తు చేస్తోంది. ఇక “ప్రేమమ్” దసరా విడుదలకు ముస్తాబవుతోంది. వీటి తర్వాత చైతూ పెళ్ళికొడుకుగా ముస్తాబవుతాడనుకుంటే ఈ ఏడాది పెళ్లిళ్లు ఉండబోవని నాగ్ సెలవిచ్చారు. దీంతో చైతూ తర్వాతి సినిమాకి రంగం సిద్ధమైంది.
‘సోగ్గాడే చిన్ని నాయనా’ సినిమాతో దర్శకుడిగా పరిచయమైన కళ్యాణ్ కృష్ణ, చైతూ హీరోగా ఓ సినిమా చేయాలని చాలా కాలంగా అక్కినేని వారి కాంపౌండ్ లోనే ఉండిపోయాడు. ఆ సినిమా ఈ నవంబర్ లో సెట్స్ మీదికి వెళ్లనుంది. ఈ సినిమాతో చైతూకి జోడీగా నటించనుంది రకుల్ ప్రీత్ సింగ్. అక్కినేని హీరోలతో ఆడిపాడటం ఆమెకిదే ప్రథమం. అన్నపూర్ణ స్టూడియోస్ పతాకంపై నాగ్ స్వయంగా నిర్మించనున్న ఈ సినిమాకి దేవి శ్రీ ప్రసాద్ సంగీతం అదనపు ఆకర్షణ. తాజా సమాచారం ప్రకారం ఈ సినిమాలో జగపతి బాబు, రావు రమేష్, సంపత్ రాజ్ కీలక పాత్రల్లో దర్శనమివ్వనున్నారట. ఇలా ఇండస్ట్రీలోని ప్రముఖ నటులు, టెక్నీషియన్లతో తనయుడి సినిమాకి క్రేజ్ తీసుకొచ్చారు నాగ్.
