Nagabandham Review: నాగ‌బంధం మూవీ రివ్యూ & రేటింగ్‌!

అత‌డికి బ్ర‌హ్మ‌క‌మ‌లం దొరికిందా? రుద్ర చెల్లెలితో (సోనియా సింగ్‌) పాటు అత‌డి కుటుంబాన్ని జుల్ఫిక‌ర్ అలీ ఎందుకు చంపేశాడు? రుద్ర‌ను ప్రేమించిన పార్వ‌తి అత‌డికి ఎలాంటి ద్రోహం చేసింది? విరాట స్వామి ఆల‌యంలోని నాగ‌బంధాన్ని ఛేదించి గుడి త‌లుపులు తెర‌వాల‌ని భైర‌వ (గ‌రుడ రామ్‌) ఎలాంటి ప్ర‌య‌త్నాలు చేశాడు? 17 శ‌తాబ్దానికి చెందిన నాగ సాధువుకు (విరాట్ క‌ర్ణ‌) రుద్ర‌కు ఉన్న సంబంధం ఏమిటి? శివుడి అండ‌దండ‌ల‌తో జుల్ఫీక‌ర్ అలీతో పాటు భైర‌వ‌ల‌ను రుద్ర ఎలా ఎదురించాడు? అన్న‌దే నాగ‌బంధం మూవీ క‌థ‌.

న‌టీన‌టుల ప‌నితీరు: నాగ‌సాధువుగా, రుద్ర‌గా డ్యూయ‌ల్ షేడ్స్‌తో కూడిన పాత్ర‌లో విరాట్ క‌ర్ణ క‌నిపించాడు. యాక్ష‌న్ స‌న్నివేశాల్లో మెప్పించాడు. లుక్ బాగుంది. ఎమోష‌న‌ల్ సీన్స్‌లో త‌డ‌బ‌డిపోయాడు. పార్వ‌తిగా విల‌నిజం ఛాయ‌ల‌తో కూడిన పాజిటివ్ పాత్ర‌లో న‌భాన‌టేష్ త‌న న‌ట‌న‌తో ఆక‌ట్టుకుంది. డ్యూయ‌ల్ రోల్‌లో క‌నిపించింది. జ‌గ‌ప‌తిబాబు, ముర‌ళీ శ‌ర్మ‌, మ‌హేష్ మంజ్రేక‌ర్‌ల‌ అనుభ‌వాన్ని ద‌ర్శ‌కుడు బాగా వాడుకున్నాడు. విల‌న్‌గా రిష‌బ్ యాక్టింగ్‌, బాడీ లాంగ్వేజ్ డిఫ‌రెంట్‌గా ఉన్నాయి. ఐశ్వ‌ర్య మీన‌న్, అన‌సూయ పాత్ర‌ల‌కు పెద్ద‌గా ఇంపార్టెన్స్ లేదు. సోనియా సింగ్‌, అంకిత్ కొయ్య న‌ట‌న ఒకే. గ‌రుడ‌రామ్ విల‌నిజం స‌రిగ్గా వ‌ర్క‌వుట్ కాలేదు. ద‌క్షా న‌గార్క‌ర్‌ది చిన్న రోలే.

సాంకేతిక నిపుణుల ప‌నితీరు: రైట‌ర్‌గా, డైరెక్ట‌ర్‌గా నాగ‌బంధం మూవీతో అభిషేక్ నామా మెప్పించాడు. విజువ‌ల్ వండ‌ర్‌గా ఈ సినిమాను స్క్రీన్‌పై ప్ర‌జెంట్ చేశాడు. శివుడి నేప‌థ్యంలో వ‌చ్చే స‌న్నివేశాలు గూస్‌బంప్స్ క‌లిగిస్తాయి. మైథాల‌జీకి మిస్ట‌రీ అంశాల‌ను జోడించి ఆరంభం నుంచి చివ‌రి వ‌ర‌కు ఉత్కంఠ‌భ‌రితంగా సినిమాను న‌డిపించారు. ద‌ర్శ‌కుడి క‌థ‌ను న‌మ్మి ప్రొడ్యూస‌ర్లు ఎక్క‌డ రాజీ ప‌డ‌కుండా సినిమా కోసం ఖ‌ర్చు చేశారు. భారీ వ్య‌యంతో సెట్స్ వేశారు. రంగ‌సాథ స్వామి ఆల‌య సెట్ చాలా రియ‌లిస్టిక్‌గా ఉంది. జునైద్ కుమార్‌, అభిషిక్త్ కొత్త‌ప‌ల్లి త‌మ సంగీతంతో భ‌క్తి ఫీల్‌ను క‌లిగించారు. న‌మోరే సాంగ్ బాగుంది. సౌంద‌ర్‌రాజ‌న్ సినిమాటోగ్ర‌ఫీ నెక్స్ట్ లెవెల్‌. సినిమాకు లెంగ్త్ బిగ్గెస్ట్ మైన‌స్‌గా మారింది. మూడు గంట‌ల ప‌ద‌హారు నిమిషాల్లో ఈజీగా ఇర‌వై నుంచి ముప్పై నిమిషాల వ‌ర‌కు ట్రిమ్ చేయ‌చ్చు.

విశ్లేష‌ణ‌: ప్ర‌స్తుతం టాలీవుడ్‌, బాలీవుడ్ అనే భేదాలు లేకుండా అన్ని ఇండ‌స్ట్రీల‌లో మైథాల‌జీ సినిమాల ట్రెండ్ న‌డుస్తోంది. భ‌క్తి క‌థ‌ల‌తో రూపొందిన సినిమాల‌కు బాక్సాఫీస్ వ‌ద్ద కాసుల వ‌ర్షం కురిపిస్తున్నాయి. ఈ ట్రెండ్‌లో వ‌చ్చిన సినిమానే నాగ‌బంధం. కేర‌ళ‌లోని అనంత‌ప‌ద్మ‌నాభ స్వామి ఆల‌యంలోని ఓ గ‌దికి నాగ‌బంధం వేయ‌బ‌డి ఉంద‌నే క‌థ‌నం ప్ర‌చారంలో ఉంది. గ‌రుడ మంత్రం తెలిసిన సిద్దులు మాత్ర‌మే దానిని తెరువ‌గ‌ల‌ర‌ని పురాణాలు చెబుతున్నాయి. ఆ క‌థ నుంచి స్ఫూర్తి పొందే ద‌ర్శ‌కుడు అభిషేక్ నామా నాగ‌బంధం క‌థ‌ను రాసుకున్నారు. శివ‌త‌త్వం, రంగ‌నాథ స్వామి ఆల‌య వైభ‌వం లాంటి అంశాల‌ను సినిమాలో చూపించారు. అంతే కాకుండా ధ‌ర్మ ప‌రిర‌క్ష‌ణ కోసం ఆయుధాలు చేప‌ట్టి నాగ‌సాధువులు ఎలాంటి పోరాటం సాగించార‌న్న‌ది నాగ‌బంధంలో ఆవిష్క‌రించారు.

కేవ‌లం మైథాల‌జీ అంశాల‌కే ప‌రిమితం కాకుండా ఫ్యామిలీ ఎమోష‌న్స్‌, ల‌వ్‌కు ఇంపార్టెన్స్ ఇచ్చారు. భైర‌వ‌కోన ఎపిసోడ్‌, జుల్ఫీక‌ర్ అలీతో పాటు అత‌డి సైన్యాన్ని ఎదురించి నాగ‌సాధువులు చేసే పోరాటం, మాన‌స దేవి టెంపుల్ ఫైట్ బాగున్నాయి. హిందూమ‌తంతో పాటు స‌నాత‌న ధ‌ర్మ గొప్ప‌త‌నాన్ని డైలాగ్స్ ద్వారా చెప్పిన తీరు ప్ల‌స్ పాయింట్‌గా నిలిచింది.

బ్ర‌హ్మ‌క‌మ‌లాన్ని ద‌క్కించుకోవ‌డానికి విల‌న్లు చేసే ప్ర‌య‌త్నాలు, వారిని ఎదురించే హీరో…ఈ చిన్న పాయింట్ చుట్టే నాగ‌బంధం క‌థ అల్లుకున్నారు. స్టోరీ ఎంత‌కు ముందుకు క‌ద‌ల‌క అక్క‌డే తిరుగుతున్న అనుభూతి క‌లుగుతుంది. ఐశ్వ‌ర్య మీన‌న్‌, అన‌సూయ‌, శ‌ర‌ణ్య‌తో పాటు చాలా మంది న‌టీన‌టులు సినిమాలో క‌నిపిస్తారు.నాలుగైదు మిన‌హా మిగిలిన పాత్ర‌ల‌కు పెద్ద‌గా ఇంపార్టెన్స్ లేదు. విరాట‌స్వామి ఆల‌య త‌లుపులు తెర‌వాల‌ని భైరాగి ఎందుకు అనుకుంటున్నాడ‌న్న‌ది చూపించేదు. ఆ ట్విస్ట్ రెండో పార్ట్‌లో చూడాల్సిందేన‌ని ప్ర‌క‌టించారు. పాట‌లుక‌థా గ‌మ‌నానికి అడ్డుగా మారాయి. ర‌న్ టైమ్ సినిమాకు బిగ్గెస్ట్ మైన‌స్‌.

ఫోక‌స్ పాయింట్‌: నాగ‌బంధం సినిమాలో విజువ‌ల్స్‌, గ్రాఫిక్స్, టెక్నిక‌ల్ వాల్యూస్ విష‌యంలో వంకా పెట్ట‌లేం. అంతా అద్భుతంగా ఉన్నాయి. కానీ కీల‌క‌మైన క‌థ విష‌యంలోనే సినిమా వీక్‌గా ఉంది.

రేటింగ్ : 2.5/5