నేచురల్ స్టార్ నాని సైలంట్ గా సినిమాలు చేస్తూ విజయాలను సొంతం చేసుకుంటున్నాడు. తాజాగా అతను నటిస్తున్న “మజ్ను” ఫస్ట్ లుక్ ని శనివారం సింపుల్ గా విడుదల చేసి టాక్ ఆఫ్ ది టాలీవుడ్ గా మారాడు. 29 ఏళ్ల క్రితం నాగార్జున హీరోగా దాసరి నారాయణరావు దర్శకత్వంలో ‘మజ్ను’ అనే చిత్రం వచ్చింది. ఈ పేరును నాగచైతన్య సినిమాకు పెట్టాలని అనుకున్నారు. మలయాళం ప్రేమమ్ సినిమా రీమేక్ కు ప్రేమమ్ అనే పేరు ఖరారు చేయడంతో.. మజ్నుగా నాని అవతారమెత్తాడు.
అర్జున్ హిట్ మూవీ ‘జెంటిల్ మాన్’ పేరుతో సినిమా చేసి హ్యాట్రిక్ అందుకున్న నాని అదే సెంటిమెంట్ ని ఇప్పుడు కొనసాగిస్తున్నాడు. ఉయ్యాల జంపాల చిత్రాన్ని డైరక్ట్ చేసిన విరంచి వర్మ దర్శకత్వంలో తెరకెక్కుతున్న ఈ సినిమా కాన్సెప్ట్ డిఫరెన్ట్ గా డిజైన్ చేశారు. “మందు తాగడం మాని . ప్రేమించడం మొదలు పెట్టండి” అంటూ ఈ తరం మజ్నుయువతకు సూచనలు ఇస్తున్నాడు. నాని చేతిలో బాటిల్ పట్టుకుని, గ్రామ్ ఫోన్ వద్ద టెడ్డీ బేర్ తో కబుర్లు చెబుతూ ఉన్న పోస్టర్ అభిమానులను విశేషంగా ఆకట్టుకుంటోంది.
ఆనందీ ఆర్ట్ క్రియేషన్స్ బ్యానర్ పై జెమినీ కిరణ్ నిర్మిస్తున్న ఈ మూవీకి, గోపీ సుందర్ సంగీతాన్ని సమకూరుస్తున్నారు. అనూ ఇమ్మాన్యుయేల్ కథానాయికగా నటిస్తోన్న ఈ సినిమాను సెప్టెంబర్ 17న ప్రేక్షకుల ముందుకు తీసుకొచ్చేందుకు విరంచి వర్మ టీమ్ శ్రమిస్తోంది.
