మెగా పవర్ స్టార్ రామ్ చరణ్ తో ‘రచ్చ’ చేసి.. మాస్ మహరాజ్ రవితేజను ‘బెంగాల్ టైగర్’ గా చూపించిన సంపత్ నంది.. బెంగాల్ టైగర్ తరువాత మరే చిత్రానికి దర్శకత్వం వహించలేదు. ఈ చిత్రం తరువాత సంపత్.. చరణ్ తో కలిసి మళ్ళీ ఓ చిత్రాన్ని చేయాలనుకున్నాడు. అది కుదరకపోవడంతో ఎనర్జటిక్ హీరోతో కలిసి పనిచేయాలనుకున్నాడు. అది కూడా కుదరలేదు.
అయితే తాజా సమాచారం ప్రకారం ఇటీవలే ‘అ..ఆ’తో హిట్ కొట్టిన నితిన్ తో కలిసి ఓ చిత్రాన్ని తెరకెక్కించే ఆలోచనలో ఉన్నాడట సంపత్. ఇటీవలే నితిన్ ను కలిసిన సంపత్.. ఓ కథ వినిపించగా, ఈ చిత్రంలో నితిన్ నటించడానికి అంగీకరించాడని ఫిల్మ్ నగర్ వర్గాల్లో వార్తలు వినిపిస్తున్నాయి. మరోవైపు నితిన్ ‘నేను శైలజ’ డైరెక్టర్ కిషోర్ తిరుమల దర్శకత్వంలోను నటించనున్నాడనే వార్తలు వినిపిస్తున్నాయి. మరి నితిన్ తదుపరి చిత్రం ఎవరితో అన్నది తెలియాలంటే మాత్రం కొద్ది రోజులు ఆగాల్సిందే.
