డైరక్టర్ సుకుమార్ గురించి ఆసక్తికర విషయాలు చెప్పిన ఎన్టీఆర్!

మాస్ హీరో అయిన ఎన్టీఆర్ ని క్లాస్ ఆడియన్స్ కి దగ్గరి చేసిన మూవీ నాన్నకు ప్రేమతో. ఇందులో ఎన్టీఆర్ ని సుకుమార్ చాలా స్టైలిష్ గా చూపించారు. అందుకే తారక్ కి ఆయనంటే చాలా ఇష్టం. సుకుమార్ నిర్మాతగా మారి తీసిన రెండో చిత్రం “దర్శకుడు”. అశోక్‌, ఈషా జంటగా నటించిన ఈ మూవీ టీజర్ ని నిన్నఎన్టీఆర్ రిలీజ్ చేశారు. ఈ సందర్భంగా సుకుమార్ గురించి ఆసక్తికర సంగతులు చెప్పారు. ‘సుకుమార్‌ రైటింగ్స్‌ కార్యక్రమానికి నేనెప్పుడు వచ్చినా, అది బాధ్యతతోనే. ‘దర్శకుడు’ అనే సినిమాను ఎంచుకోవడమే నాకు చాలా ఆనందాన్ని కలగజేస్తోంది. పేరు చూసి చిత్ర పరిశ్రమకు సంబంధించిన సినిమా అనుకుంటారు. కానీ ఇది చాలా భిన్నమైన కాన్సెప్ట్‌. సుకుమార్‌తో ‘నాన్నకు ప్రేమతో’ చేశా.

అందులో నాకు, జగపతిబాబు మధ్య జరిగే బాల్‌ సన్నివేశంలో డైలాగ్‌ను 40-50సార్లు చెప్పించారు. చెప్పిన ప్రతిసారీ బాగుందన్నారు. కానీ ఇంకా బాగా, వివిధ వేరియేషన్లలో చేద్దామని అలా చెప్పిస్తున్నారని ఆ తర్వాత అర్థమైంది. అది సినిమాపై సుకుమార్‌కు ఉండే ప్యాషన్‌. ప్రతీ నటుడు సుకుమార్‌తో కచ్చితంగా పనిచేయాలి. కథకు ఆయన ఇచ్చే ప్రాధాన్యం వేరు. మంచి కథలు తెరపైకి ఎక్కించడానికి ‘సుకుమార్‌ రైటింగ్స్‌’ ప్రారంభించి పరిశ్రమకు అందిస్తున్నారు. ఈ బ్యానర్‌లో మరిన్ని తీయాలని కోరుకుంటున్నాను” అని ఎన్టీఆర్ కోరుకున్నారు.  హరి ప్రసాద్‌ జక్కా దర్శకత్వం వహించిన “దర్శకుడు” మూవీ త్వరలో థియేటర్లోకి రానుంది.

Also, do SUBSCRIBE to our YouTube channel to get latest Tollywood updates.