పాతికేళ్ల తర్వాత అదే పాత్రలో వెంకీ!

విక్టరీ వెంకటేష్ ఏ పాత్ర చేసిన అందులో ఒదిగిపోతారు. కాలేజీ స్టూడెంట్ రోల్స్ చేసే సమయంలోనే లెక్చరర్ పాత్రలో ఆకట్టుకున్నారు. పాతికేళ్ల క్రితం కె రాఘవేంద్రరావు దర్శకత్వంలో వచ్చిన  “సుందరకాండ”  సినిమాలో జూనియర్‌ కాలేజ్‌ లెక్చరర్‌గా వెంకీ కనిపించారు. మళ్లీ ఇప్పుడు కాలేజీలో పాఠాలు చెప్పడానికి సిద్ధమవుతున్నారు. బాక్సింగ్ కోచ్ గా గురు సినిమాలో అదరగొట్టిన వెంకీ మరోమారు గురువు పాత్రనే ఎంచుకున్నారు. తేజ దర్శకత్వంలో చేయనున్న సినిమాలో  కాలేజ్‌ లెక్చరర్‌గా నటించనున్నట్లు తెలిసింది. సురేశ్‌ ప్రొడక్షన్స్, ఏకే ఎంటర్‌టైన్‌మెంట్స్‌ సంస్థలు సంయుక్తంగా నిర్మిస్తున్న ఈ సినిమా యాక్షన్‌ డ్రామాగా తెరకెక్కనుంది. లెక్చరర్‌ అనగానే డీసెంట్ గా ఉంటారని అనుకుంటే పొరబడినట్లేనని చిత్ర బృందం తెలిపింది.

ఇందులో వెంకటేష్ చాలా స్టైల్ గా కనిపిస్తారని స్పష్టం చేసింది. ఇక నేటి టాప్ హీరోయిన్స్ సీనియర్ హీరోలతో నటించడానికి వెనుకాడుతుండడంతో ఈ వెంకీ సరసన నటించే మంచి అవకాశం రాజా ది గ్రేట్ హీరోయిన్ మెహ్రీన్ ని వరించిందని ఫిలిం నగర్ వాసులు చెప్పుకుంటున్నారు. వెంకటేశ్‌ పుట్టినరోజు సందర్భంగా డిసెంబర్‌ 13న మొదలు కానున్న ఈ సినిమాలో నటించే ఆర్టిస్టులు, టెక్నీషియన్ల పేర్లు అదే రోజు అధికారికంగా ప్రకటించనున్నారు.