2023లో తమిళంలో విడుదలైన “డా డా” అనే సినిమా సూపర్ హిట్ గా నిలిచింది. తమిళ బిగ్ బాస్ కంటెస్టెంట్ గా అక్కడ సుపరిచితుడైన కవిన్ హీరోగా తెరకెక్కిన ఈ చిత్రం మంచి రివ్యూలు, కలెక్షన్స్ తో తమిళ సినిమాల్లో అన్నాఫ్ ది బెస్ట్ ఫిలింగా నిలిచింది. ఇన్నాళ్ల తర్వాత ఈ సినిమా తెలుగు వెర్షన్ ను “పా పా”గా విడుదల చేసారు. తెలుగు ప్రేక్షకుల్ని ఈ చిత్రం ఆకట్టుకోగలిగిందో లేదో చూద్దాం..!!
కథ: మణి (కవిన్), సింధు (అపర్ణ దాస్) ఇద్దరు కాలేజ్ టైమ్ నుంచి ప్రేమించుకుంటారు. జాగ్రత్తపడకపోవడం వల్ల ఇంజనీరింగ్ చదువుతుండగానే గర్భం దాలుస్తుంది సింధు. దాంతో ఇద్దర్నీ ఇంటి నుంచి వెళ్లగొడతారు వాళ్ల పేరెంట్స్.
ఆ తర్వాత కలిసి లైఫ్ స్టార్ట్ చేసి చదువు, వైవాహిక జీవితం, ప్రెగ్నెన్సీని మణి & సింధు ఎలా బ్యాలెన్స్ చేశారు? ఈ క్రమంలో వాళ్లు ఎదుర్కొన్న ఇబ్బందులు ఏమిటి? చివరివరకు కలిసే ఉన్నారా? అనేది “పా పా” కథాంశం.
నటీనటుల పనితీరు: కవిన్, అపర్ణ దాస్ పాత్రలు చాలా రిలేటబుల్ గా ఉంటాయి. ముఖ్యంగా కవిన్ క్యారెక్టర్ చాలా టచింగ్ గా ఉంటుంది. ప్రతి సందర్భం, సన్నివేశంలో మనల్ని మనం చూసుకోగలం. కవిన్ నటుడిగా ఏ స్థాయిలో ఆకట్టుకున్నాడు అనేందుకు అదే నిదర్శనం. విటివి గణేష్ కామెడీ కూడా బాగా పేలింది. బహుశా అతను తక్కువ డబుల్ మీనింగ్ మాటలు మాట్లాడిన సినిమా ఇదేనేమో.
ఈ పాత్రధారులందరి డబ్బింగ్ క్వాలిటీ కూడా బాగుంది. అందువల్ల డబ్బింగ్ సినిమా చూస్తున్నా క్వాలిటీ ఫీల్ మిస్ అవ్వదు.
సాంకేతికవర్గం పనితీరు: సంగీతం, సినిమాటోగ్రఫీ, ఆర్ట్, ప్రొడక్షన్ వంటి టెక్నికల్ టీమ్ అందరూ తమ బెస్ట్ ఇచ్చారు. ముఖ్యంగా సంగీతం సినిమాలోని ఎమోషన్స్ ను అద్భుతంగా ఎలివేట్ చేసింది.
దర్శకుడు గణేష్ కథగా కంటే కథనాన్ని నడిపించిన విధానం విశేషంగా ఆకట్టుకుంటుంది. ముఖ్యంగా.. సింగిల్ ఫాదర్ కష్టాలను కాకుండా, అతని రియలైజేషన్ పాయింట్ ను, ఆ పాత్ర తన కొడుకు కోసం పడే ఆరాటాన్ని, కొడుక్కి మంచి లైఫ్ ఇవ్వడం కోసం పడే తాపత్రయాన్ని చాలా చక్కగా చూపించాడు దర్శకుడు. ముఖ్యంగా, తన కాలేజ్ మేట్ రిఫర్ చేసిన ఉద్యోగం చివరి దశలో కోల్పోయినప్పుడు నిస్సహాయతను ప్రాజెక్ట్ చేసిన విధానం మెయిన్ హైలైట్ గా నిలుస్తుంది. అలాగే.. హీరోహీరోయిన్ల పాత్రలు మళ్లీ కలిసే సందర్భాన్ని కంపోజ్ చేసిన తీరు మంచి క్యూట్ గా ఉంటుంది. ఓవరాల్ గా.. పాత కథనే కొత్తగా చెప్పి ఆకట్టుకున్నాడు దర్శకుడు గణేష్.
విశ్లేషణ: మంచి ఎమోషనల్ కంటెంట్ ఉన్న సినిమాలను తెలుగు ప్రేక్షకులు ఎప్పుడూ ఆదరిస్తారు. “పా పా” కూడా అలాంటి మంచి సినిమానే. అయితే.. తమిళ వెర్షన్ ను ఆల్రెడీ ఆడియన్స్ అప్పట్లో ఓటీటీ ప్లాట్ ఫార్మ్ లో చూసి ఉండడం, హిందీ వెర్షన్ కూడా అందుబాటులో ఉండడం వల్ల.. ఈ సినిమాని ఇప్పుడు థియేటర్లలో ఎంతమంది చూస్తారు అనేది చెప్పడం కష్టం కానీ.. సినిమా మాత్రం బాగుంటుంది అని చెప్పొచ్చు.
ఫోకస్ పాయింట్: హృద్యమైన ఎమోషనల్ డ్రామా!
రేటింగ్: 3/5
Home
