సంగీత దర్శకుడు జివి ప్రకాష్ కుమార్ నటిస్తున్న చిత్రం పెన్సిల్. మణి నాగరాజ్ దర్శకుడిగా పరిచయమవుతూ యూత్ ఫుల్ ఎంటర్టైనర్ గా తెరకెక్కిస్తున్న ఈ చిత్రంలో ప్రకాష్ సరసన శ్రీదివ్య జంటగా నటిస్తోంది. ఇటీవలే ఈ చిత్రం సెన్సార్ కార్యక్రమాలు పూర్తి చేసుకొని యూ/ఏ సర్టిఫికేట్ తో విడుదలకు సిద్దంగా ఉంది. కొన్ని ఆర్ధిక సమస్యల కారణంగా ఈ చిత్ర విడుదల వాయిదా పడుతూ వస్తుండగా.. ఎట్టకేలకు ఈ చిత్రం ఏప్రిల్ 22 న విడుదల అవుతోంది. ఇదే విషయాన్ని జివి ప్రకాష్ తన ట్విటర్ అక్కౌంట్ లో పేర్కొన్నారు. ఇటీవలే ఈ చిత్రానికి సంబందించిన ట్రైలర్ ను విడుదల చేయగా.. ప్రేక్షకుల్లో ఈ ట్రైలర్ ఆసక్తి రేకెత్తిస్తోంది. మరోవైపు ఈ చిత్రం ద్వారా జివి ప్రకాష్ బాక్సాఫీస్ వద్ద స్టైలిష్ స్టార్ అల్లు అర్జున్ తో తలపడే అవకాశాలు ఉన్నాయి. పెన్సిల్ చిత్రాన్ని తెలుగులోనూ విడుదల చేయనుండటంతో.. బన్నీ నటించిన సరైనోడు తో ఏప్రిల్ 22 న పోటీ పడనుంది.
