రజనీ రాకతో మరింత వేడెక్కనున్న బాక్సాఫీస్..!

సౌత్ ఇండియన్ సూపర్ స్టేర్ రజనీకాంత్ హీరోగా కార్తీక్ సుబ్బరాజు డైరెక్షన్లో వస్తున్న తాజా చిత్రం ‘పేట’. ఈ చిత్రంలో సిమ్రాన్, త్రిష హీరోయిన్లుగా నటిస్తున్నారు. ‘సన్ పిక్చర్స్’ బ్యానర్ పై కళానిధి మారన్ నిర్మించిన ఈ చిత్రంలో విజయ్ సేతుపతి ఓ కీలక పాత్రలో కనిపించనున్నాడు. ‘పిజ్జా’ లాంటి డిఫరెంట్ జోనర్ చిత్రంతో టాలీవుడ్ లో కూడా మంచి క్రేజ్ ను సంపాదించుకున్నాడు కార్తీక్ సుబ్బరాజు. ఇక ఈ చిత్రం పై కూడా భారీ హైప్ ఉంది.

ఇక ఈ చిత్రం తెలుగులో థియేటర్స్ దొరకడం కష్టమని భావించి విడుదల వాయిదా వేస్తున్నారని గతంలో వార్తలు వచ్చాయి. అయితే ఆ వార్తల్లో నిజం లేదని స్పష్టం చేస్తూ తెలుగులో విడుదల తేదీని ప్రకటించారు. తమిళ్ లో ఈ చిత్రం జనవరి 11న తేదీన అత్యధిక థియేటర్స్ లో విడుదల చేస్తుండగా.. తెలుగులో కూడా సంక్రాంతి సందర్భంగా ఒకరోజు ముందుగానే .. అంటే జనవరి 10న విడుదల చేస్తున్నట్టు తాజాగా ప్రకటించారు. ఈ సినిమాకి ఒకరోజు ముందు అంటే జనవరి 9 న ‘ఎన్టీఆర్ – కథానాయకుడు’ విడుదల కాబోతుండగా… ‘పేట’ మరుసటి రోజున విడుదల కాబోతుంది. ఇక ‘వినయ విధేయక రామ’ .. ఆ మరుసటి రోజున అంటే జనవరి 11 న అలాగే ‘ఎఫ్ 2’ జనవరి 12న థియేటర్లకు రానున్నాయి. టాలీవుడ్ లో రజనీ ఫ్యాన్ ఫాలోయింగ్ గురించి ప్రత్యేకంగా చెప్పనక్కర్లేదు. తెలుగులో ‘పేట’ ఆడియో విడుదల చేయనప్పటికీ తమిళ్ పాటలనే తెగ వింటున్నారు మన తెలుగు రజనీ ఫ్యాన్స్. అయితే రజనీ రంగంలోకి దిగనుండడంతో సంక్రాంతి పోటీ మరింత వేడెక్కనుంది. అయితే సంక్రాంతికి 4 సినిమాలైనా చూడటానికి ప్రేక్షకులు కూడా రెడీ గానే ఉంటారు అనడంలో సందేహం లేదు. మరి ఈ సంక్రాంతి విజేతగా ఎవరి చిత్రం నిలబడుతుందో తెలియాలంటే మరికొన్ని రోజులు ఆగాల్సిందే.