ఈ బ్రేక్ కోసం చాలా రోజుల నుంచి వెయిట్ చేస్తున్నాను

“ఉయ్యాల జంపాలా, సినిమా చూపిస్త మావ, కుమారీ 21F” చిత్రాలతో హ్యాట్రిక్ హిట్స్ అందుకొన్న రాజ్ తరుణ్ కి ఆ తర్వాత వచ్చిన “ఈడోరకం ఆడోరకం” మినహా పెద్ద హిట్స్ లేవు. వరుసబెట్టి సినిమాలు చేస్తున్నా.. ఆశించిన స్థాయి హిట్ మాత్రం దొరకలేదు. చాలా రోజుల తర్వాత తనను పట్టి పీడిస్తున్న కామెడీ జోనర్ నుంచి బయటపడి “లవర్” అంటూ ఒక మంచి ప్రేమకథతో ప్రేక్షకుల ముందుకు రానున్నాడు. “అలా ఎలా” ఫేమ్ అనీష్ కృష్ణ దర్శకత్వంలో తెరకెక్కుతున్న ఈ చిత్రంలో రిద్ధీ కుమార్ కథానాయికగా నటిస్తుండగా.. దిల్ రాజు ఈ చిత్రాన్ని నిర్మిస్తున్నారు. ఈ చిత్రంలో రాజ్ తరుణ్ నవతరం ప్రేమికుడిగా కనిపిస్తున్నాడు.

ఈ సినిమాతో తన స్టైల్ మారిందని, దిల్ రాజు లాంటి నిర్మాతతో వర్క్ చేయడం చాలా సంతోషంగా ఉందని, ఒకవేళ దిల్ రాజు గారు గనుక తనతో ఏడాదికి ఒక సినిమా తీస్తానని చెప్పినా తాను ఇకపై సినిమాలే సైన్ చేయను అని రాజ్ తరుణ్ పేర్కొనడం విశేషం. జూలై 20న విడుదలవుతున్న ఈ చిత్రంపై రాజ్ తరుణ్ భారీ ఆశలే పెట్టుకొన్నాడు. మరి ఈ సినిమాతో మనోడి ఆశలు నిజమవుతాయో లేక గల్లంతవుతాయో తెలియాలంటే జూలై 20 వరకూ వెయిట్ చేయాల్సిందే.