Rajinikanth: రజనీకాంత్‌ ఈ సారి ఏం చెబుతారో?

ఏటా డిసెంబరు 12న రజనీకాంత్‌ అభిమానులకు పండగే. ఆ రోజు తలైవా పుట్టిన రోజు అనే విషయం తెలిసిందే. రజనీ అభిమానులు అంతగా అభిమానించే మరో రోజు ఆయన్ను కలవడం. ఆ మధ్య రజనీ రాజకీయాల్లోకి వస్తారనే ప్రచారం జరుగుతున్నప్పుడు అభిమానుల్ని తరచూ కలిసేవారు. అయితే రాజకీయాల విషయంలో ఓ విధంగా యూటర్న్‌ తీసుకున్నారు. దీంతో ఇక అభిమానుల సమావేశాలు ఇంత త్వరగా ఉండవు అని అందరూ అనుకున్నారు. అయితే అనూహ్యంగా సోమవారం అభిమాన సంఘాల నాయకుల్ని రజనీకాంత్‌ కలుస్తారని టాక్‌ వినిపిస్తోంది.

రజనీకాంత్‌ ఇటీవల యూఎస్‌ వెళ్లి వచ్చిన విషయం తెలిసిందే. ఆరోగ్య పరీక్షల కోసం ఆయన అమెరికా వెళ్లారనే విషయం ఆ నోట ఈ నోట వినడం తప్ప… ఎక్కడా అధికారిక ప్రకటన కానీ, వివరణ కానీ లేదు. దీంతో ఒక్కొక్కరు ఒక్కో రకంగా మాట్లాడుతూ ఉన్నారు. కొందరైతే సోషల్‌ మీడియాలో బహిరంగంగానే తన అనుమానాన్ని వ్యక్తం చేశారు. ఈ నేపథ్యంలో రజనీ మీటింగ్‌ ఆసక్తి రేకెత్తిస్తోంది. అయితే అభిమానులకు మాత్రం పండగ రోజు వచ్చినట్లుంది. రాష్ట్రం నలువైపుల నుండి అభిమానులు చెన్నై వస్తున్నారట.

రజనీకాంత్‌ ప్రస్తుతం ‘అన్నాతె’ పనుల్లో బిజీగా ఉన్నారు. ఇప్పటికే తన పోర్షన్‌ షూటింగ్‌ పూర్తి చేసుకున్న రజనీ… పోస్ట్‌ ప్రొడక్షన్‌ పనుల మీద ఉన్నారు. సోమవారం జరిగే మీటింగ్‌లో రజనీకాంత్‌ ఏం మాట్లాడతారు అనే విషయంలో చాలా రకాల ఊహాగానాలు వినిపిస్తున్నాయి. కొందరేమో ఆరోగ్యం గురించి చెబుతారని, ఇంకొందరేమో ఏదైనా సేవా కార్యక్రమం గురించి చెబుతారేమో అంటున్నారు. ఇంకొందరైతే రాజకీయ కోణంలో… రజనీ మనసు మార్చుకున్నారేమో అని రాస్తున్నారు. చూడాలి తలైవా ఆలోచనలు ఎలా ఉన్నాయో!

Most Recommended Video

విజయేంద్ర ప్రసాద్ గారి గురించి 10 ఆసక్తికరమైన విషయాలు..!
ఈ 10 స్పీచ్ లు వింటే ఈ స్టార్లకు ఫ్యాన్స్ అయిపోతారు అంతే..!
నయన్, అవికా టు అలియా.. డేటింగ్ కి ఓకే పెళ్ళికి నొ అంటున్న భామలు..!