“రంగస్థలం”తో ఇండస్ట్రీ హిట్ అందుకున్న మెగా పవర్ స్టార్ రామ్ చరణ్ తేజ్ తన తదుపరి చిత్రంగా రాజమౌళి దర్శకత్వంలో ఓ భారీ మల్టీ స్టారర్ చిత్రాన్ని చేయనున్న విషయం తెలిసిందే. ఎన్టీయార్ మరో కథానాయకుడిగా నటిస్తున్న ఈ చిత్రాన్ని డి.వి.వి.దానయ్య నిర్మిస్తుండగా.. ప్రస్తుతం ఈ మల్టీ స్టారర్ చిత్రానికి సంబందించిన స్క్రిప్ట్ పనులు జరుగుతున్నాయి. అయితే ఈ సినిమా బాక్సింగ్ నేపథ్యంలో సాగే అన్నదమ్ముల కథగా ఉంటుందని గతంలో వార్తలొచ్చాయి.
తాజాగా ఓ బాలీవుడ్ మీడియా కంపెనీకి ఇచ్చిన ఇంటర్వ్యూలో ఈ వార్తలపై స్పందించిన చరణ్ వాటిలో నిజం లేదని, సినిమా కథ వేరే ఉందని తేల్చి చెప్పేశారు. అలాగే.. ఎన్టీఆర్ తో కలిసి పనిచేయబోతుండటం నిజంగా ఎగ్జైటింగా ఉందని, త్వరలోనే రాజమౌళి తనకు, ఎన్టీఆర్ కు స్క్రిప్ట్ వినిపిస్తారని అన్నారు. ప్రస్తుతం చరణ్ బోయపాటి సినిమా చేస్తుండగా, ఎన్టీఆర్ త్రివిక్రమ్ డైరెక్షన్లో బిజీగా ఉన్నారు. ఈ రెండు సినిమాలు పూర్తవగానే రాజమౌళి తన షూటింగ్ మొదలుపెట్టే అవకాశాలున్నాయి.
