Ramba Oorvasi Menaka Review in Telugu: రంభ ఊర్వశి మేనక సినిమా రివ్యూ & రేటింగ్!

ముప్ఫై ఏళ్లుగా ఆ బుక్ ఓపెన్ చేసేందుకు ప్ర‌య‌త్నాలు చేస్తూనే ఉంటాడు. త‌న‌తో క‌లిసి చ‌దువుకున్న చిన్నిని (సుర‌భి) సూరి ఇష్ట‌ప‌డ‌తాడు. నెల రోజుల్లోపు ఊళ్లో చేసిన అప్పుల‌న్నీ తీర్చేస్తేనే త‌న కూతురిని ఇచ్చి పెళ్లిచేస్తాన‌ని చిన్ని తండ్రి కండీష‌న్ పెడ‌తాడు. మ‌రోవైపు సూరి త‌ల్లి ఆరోగ్యం దెబ్బ‌తింటుంది. ఆమె బ‌త‌కాలంటే ఆప‌రేష‌న్ చేయాల‌ని, అందుకు అర‌వై ల‌క్ష‌లు అవ‌స‌ర‌మ‌వుతాయ‌ని డాక్ట‌ర్లు అంటారు.

అదే టైమ్‌లో మ్యాజిక్ బుక్ ఓపెన్ అయ్యి ఇంద్ర‌లోకం నుంచి రంభ ఊర్వ‌శి మేనక సూరి ఇంటికి వ‌స్తారు. వారి దివ్య శ‌క్తుల సాయంతో త‌న క‌ష్టాల‌న్నీ తీరిపోతాయ‌ని సూరి క‌ల‌లు కంటాడు. కానీ రంభ ఊర్వ‌శి మేన‌క శ‌క్తుల‌న్నింటిని ఇంద్రుడు తీసేసుకున్నాడ‌నే నిజం బ‌య‌ట‌ప‌డుతుంది. ఆ త‌ర్వాత ఏమైంది? త‌న త‌ల్లిని సూరి బ‌తికించుకున్నాడా? అప్పుల‌న్నీ తీర్చేసి చిన్నిని పెళ్లిచేసుకున్నాడా? సూరిపై ఎస్ఐ అప్ప‌ల‌నాయుడు (తార‌క్ పొన్న‌ప్ప‌) ప‌గ‌తో ర‌గిలిపోవ‌డానికి కార‌ణ‌మేమిటి? రంభ ఊర్వ‌శి మేనక కార‌ణంగా సూరి క‌ష్టాలు ఎలా రెట్టింపు అయ్యాయి? వాటి నుంచి బాబాయ్ సీఈవో, స్నేహితుడు ప‌రిమ‌ళ (శ్రీనివాస‌రెడ్డి) సాయంతో సూరి ఎలా బ‌య‌ట‌ప‌డ్డాడు? అన్న‌దే ఈ మూవీ క‌థ‌.

న‌టీన‌టుల ప‌నితీరు: బాధ్య‌త‌లు లేకుండా బ‌లాదూర్‌గా తిరిగే యువ‌కుడిగా జోవియ‌ల్ యాక్టింగ్‌తో అల్ల‌రి న‌రేష్ (Allari Naresh) ఆక‌ట్టుకున్నారు. ఈ సినిమాకు వ‌న్ మెన్ ఆర్మీలా నిలిచాడు. అల్ల‌రి న‌రేష్ ప్రియురాలిగా సుర‌భి పాత్ర‌కు పెద్ద‌గా స్కోప్ లేదు. రంభ‌గా రాశీసింగ్‌, ఊర్వ‌శిగా విష్ణుప్రియ‌, మేన‌క‌గా ప్రిషాసింగ్ త‌మ గ్లామ‌ర్‌తో మెప్పించారు. సీఈఓగా సీనియ‌ర్ న‌రేష్‌తో పాటు ఇంద్రుడిగా వెన్నెల‌కిషోర్ కామెడీనే ఈ సినిమాకు బిగ్గెస్ట్ రిలీఫ్‌గా నిలిచింది. వారు క‌నిపించే ప్ర‌తి సీన్ సినిమాను కాపాడింది.

శ్రీనివాస‌రెడ్డి, ప్ర‌వీణ్‌, గోప‌రాజు ర‌మ‌ణ పంచ్‌లు కొన్ని వ‌ర్క‌వుట్ అయ్యాయి. తార‌క్ పొన్న‌ప్ప విల‌నిజం సెట్ట‌వ్వ‌లేదు. పూర్తిగా క‌మెడియ‌న్‌లా కాకుండా, విల‌న్ అనే ఫీల్ క‌ల‌గ‌కుండా క్యారెక్ట‌ర్‌ను క‌న్ఫ్యూజింగ్‌గా రాసుకున్నారు. డైరెక్ట‌ర్ ద‌శ‌ర‌థ్ ఓ చిన్న పాత్ర‌లో మెరిశారు.

సాంకేతిక వ‌ర్గం ప‌నితీరు: యూత్‌కు సంబంధించిన ఓ మెసేజ్‌కు వినోదాన్ని జోడించి ద‌ర్శ‌కుడు చంద్ర‌మోహ‌న్ చింతాడ ఈ క‌థ‌ను రాసుకున్నారు. సూప‌ర్ హిట్ సినిమాల స్ఫూఫ్‌లు, స్టార్ డైరెక్ట‌ర్ల‌పై పంచ్‌ల‌తో ఈ సినిమాను నింపేశారు. ఎస్‌స్వీ కృష్ణారెడ్డి య‌మ‌లీల ఛాయ‌లు ఈ సినిమాలో చాలానే క‌నిపిస్తాయి. చైత‌న్ భ‌ర‌ద్వాజ్ మ్యూజిక్ ప్లెజెంట్‌గా ఉంది. నా కంటి మీద కునుకే సాంగ్‌ ఫోక్ స్టైల్‌లో సాగితే టైటిల్ ట్రాక్ మాస్ ఆడియెన్స్ మెప్పించేలా ఉంది. అన్న‌పూర్ణ స్టూడియోస్‌, హాస్య మూవీస్ ప్రొడ‌క్ష‌న్ వాల్యూస్ ఓకే. ప‌ల్లెటూరి అందాల‌ను కెమెరామెన్ రాంరెడ్డి హైలైట్ చేసిన తీరు మెప్పిస్తుంది.

విశ్లేష‌ణ‌: క‌ష్ట‌ప‌డ‌కుండానే జీవితంలో పైకి రావాల‌ని చాలా మంది యువ‌త క‌ల‌లు కంటుంటారు. భ్ర‌మ‌ల్లో బ‌తుకుతుంటారు. సిల్వ‌ర్ స్క్రీన్‌పై క‌నిపించేవాళ్లే మాత్ర‌మే కాకుండా జీవితంలో క‌ష్ట‌ప‌డి ప‌నిచేస్తూ త‌మ కాళ్ల‌పై తాము నిల‌బ‌డిన వారంతా కూడా హీరోలే అనే మెసేజ్‌కు మ‌ద‌ర్ సెంటిమెంట్‌ను జోడిస్తూ ద‌ర్శ‌కుడు చంద్ర‌మోహ‌న్ చింతాడ రంభ ఊర్వ‌శి మేన‌క క‌థ‌ను రాసుకున్నారు. ఈ పాయింట్‌కు సోషియో ఫాంట‌సీ ఎలిమెంట్‌ను జోడించాడు.

హీరోల‌ను గెలిపించ‌డం కోసం దేవుళ్లు భూమిపైకి దిగివ‌చ్చే కాన్సెప్ట్‌ల‌తో గ‌తంలో చాలానే సినిమాలు వ‌చ్చాయి. వాటికి భిన్నంగా రంభ ఊర్వ‌శి మేన‌క (Ramba Oorvasi Menaka) ఇంద్ర‌లోకం నుంచి భూమిపైకి రావ‌డం అనే డిఫ‌రెంట్ పాయింట్‌తో ఈ క‌థ‌ను న‌డిపించాడు. అప్స‌ర‌స‌లు కూడా దేవుళ్లేన‌ని చూపించాడు.

ప్రారంభం నుంచి ప్రీ క్లైమాక్స్ వ‌ర‌కు సినిమాలో వినోదానికే ప్రాధాన్య‌త‌నిచ్చారు. రాజ‌మౌళి నుంచి జేమ్స్ కామెరూన్ వ‌ర‌కు అంద‌రూ డైరెక్ట‌ర్ల‌పై సినిమాలో పంచ్‌లు వేశారు. అవ‌న్నీ న‌వ్విస్తాయి, రంభ‌తో న‌రేష్ కాంబినేష‌న్‌లో వ‌చ్చే సీన్లు, పేర‌డీ సాంగ్స్ సినిమాకు హైలైట్‌గా నిలిచాయి. బ్యాచ్‌ల‌ర్ క‌ష్టాలు, ఐటెంగ‌ర్ల్స్ అంటే ఎవ‌రూ అంటూ సీనియ‌ర్ న‌రేష్ చెప్పే ఓ లెంగ్తీ డైలాగ్‌కు విజిల్స్ ప‌డ‌తాయి. ప‌వ‌న్ క‌ళ్యాణ్ ఓజీ ఇమిటేష‌న్ సీన్‌ వ‌ర్క‌వుట్ అయ్యింది. చివ‌ర‌లో త‌ల్లి సెంటిమెంట్‌తో సినిమాను ఎండ్ చేశారు.

ఫ‌స్ట్ హాప్ అస‌లు క‌థే లేకుండా సినిమాను న‌డిపించారు. హీరోహీరోయిన్ల ల‌వ్ ట్రాక్ నీర‌సంగా ఉంది. విల‌న్ రివేంజ్‌ను డెప్త్‌గా రాసుకోవాల్సింది. రిపీటెడ్ సీన్లు ఎక్కువే ఉన్నాయి. అవ‌న్నీ బోర్ కొట్టిస్తాయి. కామెడీతో వాటిని క‌వ‌ర్ చేశారు.

ఫోక‌స్ పాయింట్‌: లిమిటెడ్ ఫ‌న్ రైడ్‌. స్ఫూఫ్‌ల‌తో అక్క‌డ‌క్క‌డ మాత్ర‌మే రంభ ఊర్వ‌శి మేన‌క న‌వ్విస్తుంది.

రేటింగ్: 2/5