శైలేష్‌ కొలను (Sailesh Kolanu) ‘హిట్’ (HIT) సినిమాల సిరీస్‌లో విలన్‌ విషయంలో రెండు కామన్‌ పాయింట్లు ఉంటాయి. ఒకటి విలన్‌ సైకో, రెండోది ఆ విలన్‌ ఎవరు అనేది సినిమా రిలీజ్‌ వరకు ఎవరికీ తెలియకుండా జాగ్రత్త పడతారు. అయితే ఈ సారి రెండో పాయింట్‌ ముందే లీక్‌ అయిపోయింది అని అంటున్నారు. అన్నీ అనుకుంటున్నట్లుగా జరిగితే ఆ ‘సైకో’ విలన్‌ రానా దగ్గుబాటి (Rana Daggubati) అని అంటున్నారు. ప్రస్తుతం ఈ విషయంలో చర్చలు జరుగుతున్నాయి.
‘హిట్’, ‘హిట్ 2’ (HIT2) అంటూ ఇప్పటివరకు శైలేష్‌ కొలను రెండు సినిమాలు చేశారు. రెండూ మంచి విజయాలు అందుకున్నాయి. తొలి సినిమాలో హీరోగా విశ్వక్‌సేన్‌ (Vishwak Sen) నటిస్తే, రెండో సినిమాలో అడివి శేష్‌ (Adivi Sesh) నటించాడు. ఇప్పుడు మూడో సినిమా హీరో ప్రస్తావనే అక్కర్లేదు. ఎందుకంటే రెండో ‘హిట్’ క్లైమాక్స్‌లో మూడో ‘హిట్’ హీరోను చూపించేశారు. ఈ సినిమా పనులు జోరందుకున్న నేపథ్యంలో కొత్త ఊహాగానాలు వస్తున్నాయి. త్వరలో ‘హిట్ 3’ షూటింగ్‌ పనులు మొదలుపెట్టేలా ముహూర్తం షాట్‌ ఈ నెలలో ఉండొచ్చు అని చెబుతున్నారు.
ఈ క్రమంలో ఓ వెర్సటైల్‌ విలన్‌ కోసం చూస్తున్నారట. అప్పుడే రానా పేరు చర్చలోకి వచ్చిందట. అయితే రానా ఇప్పుడు అన్ని సినిమాలూ ఓకే చేయడం లేదు. సెలక్టివ్‌గా చేస్తున్నాడు. మరిప్పుడు తన ఫ్రెండ్‌ నానితో (Nani) తలపడేందుకు రానా ఓకే అంటాడా అనేది చూడాలి. ఇలాంటి ప్రయోగాత్మక పాత్రలకు రానా ఓకే చెబుతాడు అంటారు. మరోవైపు వెంకటేశ్‌తో (Venkatesh) శైలేష్‌ కొలను ‘సైంధవ్‌’ (Saindhav) సినిమా చేసిన అనుభవం ఉంది. ఆ పరిచయంతో కూడా రానా ముందుకు రావొచ్చు అని అంటున్నారు.
ఒకవేళ రానా ఈ సినిమాకు ఓకే చెబితే ఓ మంచి పాత్ర చేసినట్లు అవుతుంది. ఎందుకంటే సైకో పాత్రలకు తెలుగులో ఎప్పుడూ మంచి పేరే వస్తుంది అని అంటుంటారు. మరవైపు నాని అలియాస్‌ అర్జున్ సర్కార్‌ (హిట్ 3లో హీరో పేరు) కూడా ఇంతలా డిఫరెంట్‌గానే ఉంటుంది అని టాక్‌. టాక్‌ ఏంటి.. ‘హిట్ 2’ ఆఖరులో ఇదే మాట చెప్పారు కూడా.
