బన్నీ ఫిల్మ్ ఆలస్యం వెనుక కారణం అదేనా!

స్టైలిష్ స్టార్ అల్లు అర్జున్ సరైనోడు చిత్రం విజయం అనంతరం సినిమా ఎంపికలో చాలా జాగ్రత్త పడుతున్నాడు. తొలుత తమిళ దర్శకుడు లింగు స్వామితో సినిమా చేయాలని భావించిన బన్నీ స్క్రిప్ట్ ఇంకా పూర్తి కాకపోవడంతో ఆ మూవీని పక్కకు పెట్టాడు. గబ్బర్ సింగ్ డైరక్టర్ హరీష్ శంకర్ చెప్పిన కథ నచ్చడంతో ఒకే చెప్పాడు. ప్రముఖ నిర్మాత దిల్‌రాజు నిర్మించనున్న ఈ సినిమా సెట్స్ మీదకు వెళ్ళడానికి ఆలస్యం అయ్యేలా ఉందని ఫిలిం నగర్ వర్గాల అభిప్రాయం. ఇందుకు కారణం లేకపోలేదు. హరీష్ శంకర్ కథ చెప్పినప్పుడు బన్నీ కథలో కొన్ని మార్పులు సూచించారని, కొన్ని సీన్లు కొత్తగా రాయాలని చెప్పినట్లు తెలిసింది.

అయితే లేటెస్ట్ గా డైరక్టర్ చెప్పిన సీన్లు అల్లు అర్జున్ కి నచ్చలేదంట. వర్కౌట్ చేయమనడంతో మళ్ళీ హరీష్ శంకర్ బృందం స్క్రిప్ట్ పనిలో పడిందట. ఇంకా ప్రీ ప్రొడక్షన్ పనులు పూర్తి కాక పోవడంతో షూటింగ్ స్టార్ట్ అయ్యేసరికి ఆలస్యం అవుతుందని సమాచారం. అయితే ఈ వార్తలను చిత్ర బృందం కొట్టి పడేసింది. ఈ చిత్రంలో అల్లు అర్జున్ సరికొత్తగా కనిపించనున్నారు. కథ డిమాండ్ చేయడంతో ఎయిట్ ప్యాక్ కోసం బన్నీ శ్రమిస్తున్నారని, ఆ రూపం రావడానికి మరో రెండు నెలలు పడుతుందని, అందుకోసమే షూటింగ్ అక్టోబర్ లో పెట్టుకున్నట్లు వెల్లడించింది. మొత్తానికి బన్నీ మరో యాక్షన్ ప్యాక్ మూవీతో రానున్నాడన్న మాట.