సినిమా మీద సినిమా.. అప్డేట్ మీద అప్డేట్.. ఇదీ కోలీవుడ్ స్టార్ హీరో ధనుష్ పరిస్థితి. ఇలా సినిమా అయిందో లేదో అలా ఇంకో సినిమాకు కొబ్బరికాయ కొట్టడమో, అనౌన్స్మెంట్ రావడమో జరిగిపోతూ ఉంది. వచ్చే నెలాఖరులో ఓ సినిమా విడుదలకు సిద్ధమవుతున్న వేళ కొత్త సినిమా పనులు వేగవంతం చేస్తున్నారు. ఈ క్రమంలో హీరోయిన్ ఎంపిక జరిగిపోయింది అని సమాచారం. నిజానికి ఈ సినిమా నెక్స్ట్ సినిమా కాదు.. నెక్స్ట్ రాబోయే సినిమాకి నెక్స్ట్ సినిమా అన్నమాట.
‘కర’ సినిమా తర్వాత ధనుష్ ‘అమరన్’ సినిమా ఫేమ్ రాజ్ కుమార్ పెరియస్వామి దర్శకత్వంలో ఓ సినిమా చేస్తున్నాడు. D55 వర్కింగ్ టైటిల్తో నడుస్తున్న ఈ ప్రాజెక్ట్లో శ్రీలీల, సాయి పల్లవి హీరోయిన్లుగా నటిస్తున్నారు. మలయాళ స్టార్ యాక్టర్ మమ్ముట్టి ఓ కీలక పాత్రలో కనిపించనున్నారు. ఈ సినిమా తర్వాత ధనుష్ ‘లబ్బర్ పందు’ ఫేం తమిళరసన్ దర్శకత్వంలో ఓ సినిమాలో నటించనున్నాడు. ఆ సినిమా కాస్టింగ్ పనులు కూడా వేగంగా జరుగుతున్నాయి.
D56 వర్కింగ్ టైటిల్తో సిద్ధమవుతున్న ఈ పీరియాడికల్ ఫాంటసీ, పొలిటికల్ యాక్షన్ సినిమాలో రుక్మిణీ వసంత్ని హీరోయిన్గా ఎంపిక చేసినట్లు తెలుస్తోంది. కన్నడ సినిమాతో క్లాస్ హీరోయిన్గా కెరీర్ ప్రారంభించిన రుక్మిణి.. ఇటీవల కాస్త గ్లామర్ డోస్ పెంచి స్టార్ హీరోయిన్ మెటీరియల్ అనిపించుకుంది. ఇప్పుడు ధనుష్తో సినిమా చేయనుంది. మరోవైపు తెలుగులో ఎన్టీఆర్ – ప్రశాంత్ నీల్ ‘డ్రాగన్’ సినిమాలోనూ ఆమెనే కథానాయిక.
ఇక ‘కర’ సినిమా విషయానికొస్తే.. విఘ్నేశ్ రాజా దర్శకత్వంలో రూపొందిన ఈ సినిమాలో మమితా బైజు హీరోయిన్గా నటిస్తోంది. ఏప్రిల్ 30న ఈ సినిమా థియేటర్లలోకి రానుంది. అదే రోజు రామ్చరణ్ – బుచ్చిబాబు సానా – జాన్వీ కపూర్ సినిమా ‘పెద్ది’ కూడా వస్తున్న విషయం తెలిసిందే.
