పవన్ కళ్యాణ్ ఫ్యాన్ గా సాయి పల్లవి ?

పవర్ స్టార్ పవన్ కళ్యాణ్ అనగానే ఆయన మెడపైన చెయ్యిపెట్టే మేనరిజం గుర్తుకొస్తుంది. పవన్ ఫ్యాన్స్ అందరూ ఆ మేనరిజంని ఫాలో అయి పోతుంటారు. ఇప్పుడు ఆ మేనరిజంని దర్శకుడు శేఖర్ కమ్ముల అనుకరిస్తున్నారు. అంతేకాదండోయ్ కేరళ కుట్టీ సాయి పల్లవికి చెయ్యిని మెడపైన ఎలా పెట్టాలో నేర్పిస్తున్నారు.

ఎందుకు అనుకుంటున్నారా ? ఆయన డైరక్షన్ లో తెరకెక్కనున్న “అమెరికా అబ్బాయి.. తెలంగాణ అమ్మాయి” సినిమా కోసమే. ఇందులో మెగా ప్రిన్స్ వరుణ్ తేజ్ అమెరికా అబ్బాయిగా నటిస్తుంటే.. సాయి పల్లవి తెలంగాణ అమ్మాయిగా అదరగొట్టనుంది. ప్రముఖ నిర్మాత దిల్ రాజు నిర్మిస్తున్న ఈ సినిమా షూటింగ్  జులై 25 నుంచి  మొదలు కానుంది. ఈ సందర్బంగా చిత్ర బృందానికి శేఖర్ కమ్ముల వర్క్ షాప్ నిర్వహిస్తున్నారు. ఇందులో చిత్ర హీరో, హీరోయిన్లు వరుణ్, పల్లవి కూడా పాల్గొన్నారు. ఇద్దరికి పాత్రల గురించి  డైరక్టర్ వివరించారు.

ఆ సమయంలో క్లిక్ మనిపించిన రెండు ఫోటోలు సోషల్ మీడియాలో లైక్ లు అందుకుంటోంది. వీటిలో ఒక ఫొటోలో  పవన్ మేనరిజంని శేఖర్ కమ్ముల, పల్లవి  అనుకరించడం చూసి ..”పల్లవి చెయ్యబోయే పాత్రకి పవన్ అంటే విపరీతమైన అభిమానం  ఉంటుంది.. అలాంటి పిల్ల పవన్ స్టైల్ లో మాట్లాడుతుంటే.. అమెరికా అబ్బాయి నోరెళ్ళ బెట్టి చూడాల్సిందే ” అని కొందరు కామెంట్లు విసురుతున్నారు. బహుశా నిజం కూడా అదే అయి ఉంటుందని సినీ పండితులు వంత పాడుతున్నారు.