‘బంపర్ ఆఫర్’… అలా చేజారిపోయింది!

అన్న (పూరి జగన్నాధ్) అగ్ర దర్శకుడైనా ఆ స్థాయిలో హీరోగా రాణించలేకపోయాడు సాయిరాం శంకర్. అలా అని హీరో మెటీరియల్ కాదా అంటే.. పూరి వద్ద ఏడేళ్ల కఠిన శిక్షణ పూర్తి చేసుకుని అన్న పెట్టిన పలు పరీక్షలను దాటి హీరోగా ఎంట్రీ ఇచ్చాడు. ఇక విజయాల మాటకొస్తే.. పూర్తిగా లేవనీ కాదు కానీ పరాజయాలు వాటిని మించి ఉన్నాయి. ఇలాంటి ఒడిదుడుకుల ప్రయాణం చేస్తోన్న పూరి తమ్ముడి కెరీర్లో సూపర్ హిట్ అని చెప్పుకోదగ్గ ఏకైక సినిమా ‘బంపర్ ఆఫర్’. సాధారణంగా ఇలాంటి ఓ హిట్ పడ్డాక కెరీర్ కాస్త ఊపందుకుంటుంది. అయితే సాయి విషయంలో అది జరుగలేదు. ఆ మాటకొస్తే.. ఇప్పటివరకు మరో హిట్టే లేదు.

ఒక్కసారి వచ్చేదే ‘బంపర్ ఆఫర్’ అనుకుంటే సాయికి దాన్ని మించినది మరోటి వచ్చింది. ‘బంపర్ ఆఫర్’ సినిమా పూర్తి కాగానే నట సామ్రాట్ అక్కినేని నాగేశ్వరరావు, శ్రీహరి, సాయిరాం శంకర్ కలయికలో ఓ సినిమా తెరకెక్కాల్సి ఉందట. ఇంతటి భారీ కాంబినేషన్ లో సినిమా అని సాయి ఈ సినిమా కోసం మిగతా సినిమాలన్నిటినీ పక్కన పెట్టి ఎనిమిది నెలలకు పైగా వేచి చూశాడు. సరిగ్గా అప్పుడే ముహూర్తం చూసుకుని మరీ వచ్చిన ఆ చిత్రాన్ని నిర్మించాల్సిన వ్యక్తి వచ్చి తన వల్ల కాదన్న వార్త చెప్పిపోయాడు. అలా మరో ‘బంపర్ ఆఫర్’ వచ్చినట్టే వచ్చి చేజారిపోయింది. ఆ సినిమా వచ్చి ఉంటే సాయి స్టార్ హీరో అయ్యుండేవాడేమో.. గమ్మత్తేమిటంటే సదరు నిర్మాత ఆ సినిమా చేయలేదని పూరి ముందే చెప్పాడట.. అదీ పూరి గురి! ఇదిలా ఉంటే ప్రస్తుతం సాయి ఆశలన్నీ ‘అరకు రోడ్ లో’ సినిమా మీదనే.