Sai Tej: ‘క’ డైరక్టర్‌లు.. మావయ్య నిర్మాతతో సాయితేజ్‌ కొత్త సినిమా!

‘మన శంకరవరప్రసాద్‌ గారు’ సినిమా తర్వాత నిర్మాత సాహు గారపాటి ఎలాంటి సినిమా చేస్తారు, ఎవరితో చేస్తారు అంటూ గత కొన్ని రోజులుగా చర్చ జరుగుతూనే ఉంది. పెద్ద నిర్మాతల వరుసలో లేకపోయినా రూ.300 కోట్లకుపైగా వసూళ్లతో ఈ సంక్రాంతికి భారీ విజయం అందుకున్న నిర్మాత ఆయన. అందుకే నెక్స్ట్‌ ప్రాజెక్ట్‌ ఆసక్తికరంగా మారింది. దీనిపై ఇప్పుడు ఓ క్లారిటీ వచ్చింది. తమ బ్యానర్‌లో కొత్త సినిమాను హిట్‌ సినిమా దర్శకద్వయంతోనే తెరకెక్కించనున్నారు. అంతేకాదు ఆ సినిమా మెగా ఫ్యామిలీ హీరోతోనే.

Sai Tej

అన్నీ అనుకున్నట్లుగా జరిగితే ఈ ఉగాదికి సినిమా ఓపెనింగ్‌ ఉండొచ్చు అని చెబుతున్నారు. ‘క’ సినిమాతో తొలి ప్రయత్నంలో మంచి విజయం అందుకుని, ఆ హీరో (కిరణ్‌ అబ్బవరం)ను తిరిగి విన్నింగ్‌ ట్రాక్‌ ఎక్కించిన సుజీత్‌ అండ్‌ సందీప్‌ దర్శకత్వంలో ఈ సినిమా ఉండబోతోంది. ఇందులో హీరోగా సాయితేజ్‌ నటిస్తాడు. ‘క’ సినిమాలాగే ఈ సినిమా కూడా ఆసక్తికరమైన బ్యాక్‌డ్రాప్‌లో ఉండబోతోంది అని సమాచారం. సినిమా ప్రారంభించేటప్పుడు కాన్సెప్ట్‌ వీడియోను కూడా రిలీజ్‌ చేస్తారని తెలుస్తోంది.

సుజిత్ – సందీప్ ఈ సినిమా కథ కోసం ఏడాదిన్నరగా పని చేస్తున్నారట. ప్రీ ప్రొడక్షన్, స్క్రిప్ట్ పనులు కొలిక్కి వచ్చాయని కూడా చెబుతున్నారు. ‘క 2’ ఉంటుందని ‘క’ సినిమా క్లైమాక్స్‌లోనే చెప్పారు సుజీత్‌ అండ్‌ సందీప్‌. ఇప్పుడు సాయితేజ్‌తో సినిమా అంటే ఆ సినిమా ఇప్పట్లో లేనట్లే అని చెప్పొచ్చు. ఒకవేళ ఉన్నా హీరో మారే అవకాశం ఉందని ఈ మధ్య ఆ సినిమా నిర్మాత కూడా చెప్పారు. ఇక సాయితేజ్‌ విషయానికొస్తే.. ప్రస్తుతం ‘సంబరాల యేటి గట్టు’ సినిమా పనుల్లో ఉన్నాడు. త్వరలో సినిమా రిలీజ్‌ డేట్‌ చెబుతారట.

ఇప్పటికే ఆ సినిమా విడుదల కావాల్సి ఉన్నా.. విజువల్‌ ఎఫెక్ట్స్‌ పనులు, ఇతర పనుల వల్ల సినిమా ఆలస్యమవుతూ వస్తోంది. సమ్మర్‌లో వస్తారు అని చెబుతున్నా ఇంకా ఏ విషయమూ చిత్రబృందం అధికారికంగా చెప్పడం లేదు.

అనుపమకు ఇచ్చిన మాట నిలబెట్టుకుంటారా? ఆ సినిమాలోకి తీసుకుంటారా?