థ్రిల్ చేయడానికి సిద్ధమవుతున్న సమంత!

“సమంత నటనకు దూరం కావడం లేదు” నాగచైతన్య లేటెస్ట్ గా ఇచ్చిన స్టేట్మెంట్. సో సమంత సినిమాలు చేస్తూనే ఉంటుందనే విషయంలో పక్కా క్లారిటీ వచ్చింది. అయితే  సమంత గురించి చెబుతూ.. తన తండ్రి అక్కినేని నాగార్జున మాదిరిగానే తన  భార్య కథల ఎంపికలో నిర్ణయం తీసుకుంటుందని ప్రసంశలు గుప్పించారు. ఆ విషయం ఆమె కెరీర్ గ్రాఫ్ ని చూస్తే అర్ధమవుతోంది. సమంత నటించే సినిమాలు సూపర్ హిట్ కావడం లేదు.. సూపర్ హిట్ అయ్యే సినిమా ఆకథలనే ఆమె ఎంపిక చేసుకుంటుందని స్పష్టమయింది. ఈ రంగంలో అనుభవం పెరిగే కొద్దీ విభిన్నమైన కథలను ఎంచుకుంటోంది. రీసెంట్ గా రంగస్థలం, అభిమన్యుడు (అనువాదం) వంటి విజయాలను అందుకున్న ఈ బ్యూటీ కన్నడలో హిట్ సాధించిన యు టర్న్ రీమేక్ లో నటిస్తోంది.

తమిళంలో సూపర్ డీలక్స్, సెమ్మ రాజా సినిమాలను చేస్తోంది. దీని తర్వాత నాగచైతన్యతో కలిసి ఓ సినిమా చేయబోతోంది. అవన్నీ పక్కన పడితే హాలీవుడ్ కథకి సమంత కనెక్ట్ అయినట్లు తెలిసింది. టామ్ క్రూయిజ్ ప్రధాన పాత్ర పోషించిన  ‘కొలాటెరల్’ స్ఫూర్తితో  “అర్జున్ రెడ్డి” దర్శకుడు సందీప్ రెడ్డి వంగా శిష్యుడైన గిరిసయ్య డైరెక్టర్ గా పరిచయం కావడానికి ఓ స్టోరీ రాసుకున్నాడు. ఇందులో అనేక కీలక పాత్రలు ఉన్నాయట. వాటిని అరుణ్ ఆదిత్ తో పాటు నవదీప్, మురళీ శర్మ, సాయిచంద్ పోషిస్తారని తెలిసింది. ఇక సమంత అయితే ట్యాక్సీ డ్రైవర్ గా కనిపించి థ్రిల్ చేస్తుందని సమాచారం. ఈ పాత్రకు సైతం తప్పకుండా న్యాయం చేస్తుందని ఆమె అభిమానులు ధీమాగా చెబుతున్నారు.