అరుంధతి ఖాతాలో ఇంకెంతమంది..?

ఎవరి కష్టాలు, విజయాలు వారివే కానీ.. అభిమానం కొద్దీ రామ్ చరణ్, మరో చిరంజీవని, నాగచైతన్యను అక్కినేని వారసుడని అంటూంటారు. ఇక్కడివరకు బాగానే ఉంది. అదే వరుణ్ సందేశ్ ని పవన్ కళ్యాణ్ తో పోలిస్తే.. మినీ వరల్డ్ వార్ కి శంఖం పూరించినట్టే. ఇక్కడ చెప్పొచ్చేదేమిటంటే.. మన పరిశ్రమ పెద్దలు కొంతమంది అవకాశం వచ్చినపుడల్లా అవతలి వారిని పొగడటానికి పైసా ఖర్చు లేదు కదా అని రకరకాల పోలికలు వాడుతుంటారు.

అలా నోరు తెరిచినపుడల్లా వాడుతున్న పోలికల్లో ‘అరుంధతిలో అనుష్క’ ఒకటి. కోడి రామకృష్ణ సృష్టించిన అరుంధతి అనుష్క కెరీర్ లో ప్రత్యేకం అన్న విషయంలో ఎలాంటి అనుమానమూ లేదు. అయితే అక్కడుకినుండి హీరోయిన్ ఓరియెంటెడ్ సినిమా అంటే చాలు.. ఆ సినిమా మరో అరుంధతి అని, సదరు హీరోయిన్ మరో అనుష్క అని లబలబా వాగేస్తుంటారు. నిన్నటికి నిన్న ‘అవంతిక’ అనే సినిమా ప్రారంభోత్సవం లోను జరిగిందిదే.చిన్న సినిమాలతో సెంచరీ కొట్టే ప్రయత్నంలో ఉన్న నిర్మాత తుమ్మలపల్లి రామసత్యనారాయణ నిర్మాణంలో ‘అవంతిక’ పేరుతో ఓ కొత్త సినిమా మొదలైంది. దాసరి, సి కళ్యాణ్ వంటి ప్రముఖులు హాజరై ‘అరుంధతి’గా వర్ధిల్లమని దీవించారు.

పోనీ అక్కడ అంత విషయం ఉందా అంటే అక్కడ ఉన్నది కోడి రామకృష్ణ కాదు కదా అతడి శిష్యుడి దూరపు బంధువు కూడా కాదు. బుల్లితెర, వెండితెర కలిపి కొన్ని పాత్రలు చేసి ఆ మధ్య ఇద్దరు అమ్మాయిల మధ్య ‘ఎఫైర్’ అని హీటెక్కించిన శ్రీరాజ్. జంతు బలులు వంటి మూఢ నమ్మకాల నేపథ్యంలో తెరకెక్కుతున్న ఈ సినిమాలో పూర్ణ ప్రధాన పాత్ర పోషిస్తోంది. ‘శ్రీ మహాలక్ష్మి’ సినిమాతో టాలీవుడ్ కి ఎంట్రీ ఇచ్చిన పూర్ణ, ‘అవును’ సినిమాతో గుర్తింపు తెచ్చుకుంది. ఆపై అల్లరి నరేశ్ తోనూ కొన్ని సినిమాల్లో ఆడిపాడిన ఈ మలయాళ సుందరి ప్రస్తుతం ‘రాజుగారి గది’ వంటి సినిమాలు చేస్తూ బండి నడుపుతోంది.