సినిమా సెట్స్‌లో మహిళలకు తగిన గౌరవం లభించదు, కనీస మర్యాద కూడా లభించదు అని కొంతమంది నటీమణులు తరచుగా అంటూ ఉంటారు. నిజమా ఇలా కూడా జరుగుతుందా అని బయటి జనాలు అంటూ ఉంటారు. అయితే ఇలాంటి ఘటనలు నిజం అని గతంలో జరిగిన విషయాల్ని ఎవరైనా చెప్పినప్పుడో, లేక ఇండస్ట్రీలో ఏవైనా కమిటీలు వేసి వాళ్లు నివేదికలు ఇచ్చినప్పుడో తెలుస్తుంటాయి. తాజాగా సీనియర్‌ నటి శోభన (Shobana) ఇలాంటి విషయాన్నే ఒకటి చెప్పుకొచ్చారు.
సీనియర్‌ నటి శోభన (Shobana) ఇటీవల ఇన్‌స్టాగ్రామ్‌లో అభిమానులతో ముచ్చటించారు. ఈ క్రమంఓ తన కెరీర్‌కు సంబంధించిన ఎన్నో ఆసక్తికర విషయాలను పంచుకున్నారు. బాలీవుడ్‌ అగ్ర నటుడు అమితాబ్‌ బచ్చన్‌తో (Amitabh Bachchan) ‘కల్కి 2898 ఏడీ’ (Kalki 2898 AD) సినిమాలో పని చేయడం గురించి మాట్లాడారు. అలాగే ఆయనతో గతంలో ఓసారి నటించినప్పుడు జరిగిన విషయాన్ని కూడా ప్రస్తావించారు. దీంతో పరిశ్రమలో ఇంత దారుణంగా ఉంటుందా అని సిగ్గుపడే పరిస్థితి వచ్చింది.
అమితాబ్‌ బచ్చన్‌తో ‘కల్కి 2898’ సినిమా కంటే ముందు చాలా ఏళ్ల క్రితం ఓ సినిమా చేశాను. ఆయన హీరోగా నటించిన ఆ సినిమాలో ఒక పాటకు డ్యాన్స్‌ చేశాను. ఆ పాట షూటింగ్‌ అహ్మదాబాద్‌లో జరిగింది. ఆ పాట కొరియోగ్రఫీ ప్రకారం తాను చాలా కాస్ట్యూమ్స్‌ మార్చుకోవాల్సి ఉందని, అయితే హీరో కోసం కారవాన్‌ తెప్పించారు కానీ తనకు ఇవ్వలేదని శోభన చెప్పుకొచ్చారు. ఈ క్రమంలో అమితాబ్‌ను చూడటానికి ప్రజలు భారీ సంఖ్యలో సెట్‌కి వచ్చారు.
దీంతో దుస్తులు మార్చుకోవడానికి నా కారవాన్‌ ఎక్కడ? అని శోభన అడిగారట. అప్పుడు టీమ్‌లోని ఒక వ్యక్తి ‘‘ఆమె కేరళ నుండి వచ్చారు. అక్కడివాళ్లు దేనికైనా సర్దుకుపోతారు. చెట్ల వెనక్కి వెళ్లి దుస్తులు మార్చుకుంటుందిలే’’ అని అన్నాడట. ఆ మాటలను అమితాబ్‌ బచ్చన్‌ వాకీ టాకీలో విన్నారట. దాంతో బాగా కోపం వచ్చి. వెంటనే కారవాన్‌ నుండి బయటకు వచ్చి ఆ వ్యక్తిని తిట్టారట. ఆ తర్వాత తన కారవాన్‌ను శోభనకు ఇచ్చారట.
Home
