ఆన్స్క్రీన్లో హిట్ అయిన జోడీ… ఆఫ్ స్క్రీన్లో హిట్ అవ్వాలని లేదు. అదే ఆఫ్స్క్రీన్లో హిట్ అయిన జోడీ… ఆన్స్క్రీన్ మీదకు ఎప్పుడు వచ్చినా ఆసక్తికరంగానే ఉంటుంది. అలాంటి కాంబినేషన్లు మనకు తక్కువగానే ఉన్నాయి. అలాంటి వారిలో సూర్య (Suriya) – జ్యోతిక (Jyothika) కూడా ఉన్నారు. సినిమాల్లో కలసి నటించి… ఆ తర్వాత ప్రేమించి, పెళ్లి చేసుకున్నారు ఈ ఇద్దరు. పెళ్లి అయ్యాక మళ్లీ ఇద్దరూ స్క్రీన్ మీద ఒకేసారి కనిపించి కనువిందు చేయలేదు. అయితే ఇప్పుడు అభిమానులకు ఆ అవకాశం ఇస్తున్నారు అని టాక్.
‘పూవెల్లం కేట్టుప్పార్’ అనే తమిళ సినిమాతో సూర్య – జ్యోతి తొలిసారి కనిపించి మెరిపించారు. ఆ తర్వాత ఎన్నో విజయవంతమైన చిత్రాల్లో కలిసి నటించి అదుర్స్ అనిపించారు. ‘ఉయిరిలే కలందదు’, ‘పేరళగన్’, ‘కాక్క కాక్క’, ‘సిల్లన్ను ఒరు కాదల్’ (Sillunu Oru Kaadhal) , ‘మాయావి’ చిత్రాల్లో నటించారు. దీంతో మళ్లీ వీరిద్దరిని తెరపై ఎప్పుడెప్పుడు జంటగా చూస్తామా అని ఎదురు చూస్తున్నారు. ఎట్టకేలకు ఈ ఇద్దరి కాంబినేషన్లో ఓ సినిమా తెరకెక్కనున్నట్లు సమాచారం.
‘బెంగుళూరు డేస్’ సినిమా ఫేమ్ అంజలి మేనన్ దర్శకత్వంలో ఈ సినిమా తెరకెక్కనుంది. ప్రస్తుతం ఈ విషయముపై చర్చలు జరుగుతున్నాయట. త్వరలో సినిమాకు సంబంధించి అధికారిక ప్రకటన ఉంటుంది అని చెబుతున్నారు. ఒకవేళ ఈ సినిమా ఓకే అయితే దాదాపు 18 ఏళ్ల తరవాత వీరిద్దరి కాంబినేషన్లో సినిమా వస్తున్నట్లు లెక్క. మరి ఈ సినిమా ఎలా ఉంటుంది అనేది చూడాలి.
ఇక సూర్య సినిమాల సంగతి చూస్తే… త్వరలో ‘కంగువా’తో తెరపైకి రావడానికి సిద్ధమవుతున్నాడు. ఈ సినిమా ఫస్ట్ లుక్తో ఇప్పటికే కోలీవుడ్ షేక్ అయింది. కార్తీక్ సుబ్బరాజుతో తన 44వ చిత్రాన్ని కూడా ప్రకటించారు. ఈ సినిమా చిత్రీకరణను జూన్లో మొదలుపెట్టనున్నట్లు సమాచారం. పీరియాడిక్ వార్ అండ్ లవ్ నేపథ్యంలో ఈ సినిమా ఉంటుందట. వచ్చే ఏడాది సంక్రాతికి ఈ సినిమా విడుదల కానుందని సమాచారం.
