క్రికెట్ టీమ్ – సినిమా టీమ్.. ఈ రెండూ ఒక లాంటివే అంటుంటారు. రెండూ టీమ్ స్పోర్ట్లు.. ఏ ఒక్కరూ బాగా ఆడకపోయినా/ పని చేయకపోయినా ఆ పని సక్రమంగా సాగదు. క్రికెట్ విషయంలో ఎలా అయితే పరాజయం వచ్చాక.. తప్పులు వెతకడం స్టార్ట్ చేస్తామో.. సినిమా విషయంలోనూ పరాజయం వచ్చాక సమస్య ఎక్కడుంది అనే చర్చ మొదలవుతుంది. ఈ క్రమంలో ఆ సినిమా షూటింగ్లో ఏం జరిగింది, సెట్స్లో ఏమైంది అనే విషయాలు బయటకు వస్తాయి.
ఇప్పుడు ‘ది ప్యారడైజ్’ సినిమా విషయంలోనూ ఇదే జరుగుతోంది. నాని కెరీర్లో మొదటిసారిగా ఆయన సినిమా గురించి సోషల్ మీడియాలో ఈ స్థాయిలో డిస్కషన్ జరుగుతంది అంటే ఆశ్చర్యపోనక్కర్లేదు. సినిమా ఫలితం విషయంలో దారుణమైన రియాక్షన్స్ వస్తున్నాయి. వాటికి నాని కూడా పాజిటివ్గానే రియాక్ట్ అయ్యాడు. శనివారం నాడు జరిగిన ప్రెస్మీట్లో ఈ సినిమాకు అన్నీ కొత్తగానే జరిగాయి. షూటింగ్ జరిగిన తీరు, విడుదలకు సమయం దగ్గర పడుతున్న కొద్దీ చోటు చేసుకున్న పరిణామాలు, ట్రైలర్ లేకపోవడం లాంటివి జరిగాయి అని చెప్పాడు నాని.
ఒక కొత్త సినిమాను ఒక కొత్త అనుభూతితో తెరకెక్కిద్దాం అనుకున్నాం. కానీ, స్పందన కూడా అంతే కొత్తగా వచ్చింది. ఇప్పుడు ఎక్కడ చూసినా, ఏం ఓపెన్ చేసినా ‘ప్యారడైజ్’ (The Paradise) కనిపిస్తోంది. అది చెడుగనా, మంచిగాన అన్నది పక్కన పెట్టేద్దాం. అంతటా ప్యారడైజ్ వినిపిస్తోంది అంతే అంటూ ఒక రకం వేదాంతంలా మాట్లాడాడు నాని. ఇక దర్శకుడు శ్రీకాంత్ ఓదెల అయితే.. షూటింగ్లో నానికి, తనకు గొడవలయ్యాయని ఒప్పేసుకున్నారు. అలిగిన విషయం నిజమే అనేశారు.
మన వెనుక ఎవరు మాట్లాడుకుంటున్నారో చూసుకుంటూ ఉంటే గమ్యాన్ని చేరలేం. ఎవరినీ పట్టించుకోవాల్సిన అవసరం లేదు. సినిమా సెట్లో దర్శకుడు, హీరోకు మధ్య ఎన్నో జరుగుతాయి. ఎవరికీ చెప్పాల్సిన అవసరం లేదు. ఎవరికీ భయపడాల్సిన అవసరం లేదు. ఆవేశం, కోపం, ఉన్న వాళ్లకు ఎమోషన్స్ ఎక్కువగా ఉంటాయి అని మోహన్బాబు అన్నారు. ఈ లెక్కన ‘ప్యారడైజ్’ సెట్లో అంతా సవ్యంగా జరగలేదు అని క్లారిటీ వచ్చేసింది.
